• إعلانات المنتدى

    • Gamiela

      ضيوفنا الكرام   21 يون, 2017

      اعلان هام - فتح جميع منتديات المكتبة للزوار دون الحاجة للعضوية http://www.sudanesesongs.net/ قمنا اليوم بفتح المكتبة لجميع الزوار لتنزيل جميع الأغاني التي جمعتها المكتبة عبر السنين ...
      كان الحلم ان يأتي هذا اليوم في حياة الصديق الراحل المقيم عادل خليفة ...
      خطفه منا القدر ... و لكنا الان نوفي بالوعد ...
      الان و دون الحاجة للتسجيل او العضوية ...
      يمكن لجميع الزوار الاستمتاع بمواد المكتبة الغنائية و التي تصل في حجمها الى اكثر من 500 جيجا بايت
      فقط اضغط على الرابط للوصول للمكتبة ...
      ثم ابحث عن جيل فنانك المفضل و تابع الحرف الابجدي ... بعدها ستصل الى جميع المواد متاحة دون الحاجة للاشتراك ... للتنبيه ... فقط أعضاء المكتبة الذين يمكنهم ( رفع ) المواد للمكتبة و مازال باب العضوية متاح لكل من يريد رفد المكتبة بمواد جديدة .. و كل عام و جميع اهل السودان بخير و عافية   عن إدارة و مشرفي و أعضاء مكتبة الأغنية السودانية يحيى قباني المشرف العام http://www.sudanesesongs.net/
Gamiela

الشاعر مصطفي ودالماور "نشيل الفاتحة لي كلتوم"

عدد ردود الموضوع : 1



قرأت مقال للمرحوم موسى المبارك يحكي نثراً بأحد الصحف السودانية عن كلتوم وسيد اللبن اللذان أقتيلا غدراً ..
لا أعرف كلتوم ولم أشهد الأحداث كنت حينها في القاهرة ..
ولكني تعاطفت مع كلتوم ووضعت سناريو لمقال المرحوم
موسى المبارك شعراً وقد نشرت هذه القصيدة
وقتها بجريدة الأيام .. وأفردت لها الصفحة الأخيرة .


نشيل الفاتحه لي كلتوم - القاهرة 1976م

كل الدنيا في دا اليوم
وأيّ وكالة للأنباء
جابت سيرة {الخرطوم}
ورغم القالوا من أنباء
فاتم يقولوا عن كلتوم
* * *
بروي القصة واحد شاف
وبعرف أظنو ناس كلتوم
وقال كلتوم
حاّجة مسنة من سنكات
وليها بنية فد ويحيده في الخرطوم
لامن ربك المتعال
سهل ليها باقي هموم
وحلفت انو في دا العام
لازم توصل الخرطوم
أخدت ليها مقشاشات
وشالت ليها مصلايات
وسامت ليها حبات دوم
وشان خاطر بنيتا ديك
كاست حتى للمعدوم
وقامت فوق لواري الخيش
تلاتة ايام .. مواصلة السفره للخرتوم
مقنقله في الحديد الفوق
لامن وصلت الخرطوم
وفي الخرطوم
فضلت لافه طول اليوم
تمسك زول وتسال زول
"دحين ما شفت ليك { هَلُّومْ }
ماخدا مني {ود أدروب }
سواق تكسي إندو لزوم
هوي يا ناس تئبت خلاس
لو كان شفتو ود أدروب
سايق تكسي هايم هوم
بفتش لي مهل ساكن
الآقي بتي إندو وأنوم "
وزادت مشكلة كلتوم
وزادت فوق هموما هموم
تاكل وين ؟
وياتو محل عليه تنوم
شايله هموم
يجازيك الله يا الخرتوم
كايسة النوم
ولما جاء الشفق طالع
لقت مجموعة جنب جامع
ظروفا مشابهة فقر النوم
وجات ليهم هناك كلتوم
وأخذت زاويه
بين الصاحي والمحموم
ونامت نومه
فَضّتْ كل تعب اليوم
وفي دي النومه
شافت في المنام {سنكات }
وقال في الحلمه
انها ماشة جنب نعجات
سمان وغلاد وليها قرون
تنطح مره في المارين
وتنطح مره في كلتوم
وقال كلتوم من النطحه تقع وتقوم
وخافت منهن كلتوم
وسالت من جبينه دموم
صحت كلتوم
وحمدت ربها القيوم
لانه الجاها كان في النوم
* * *
صحت كلتوم
والصحاها صوت الناس
أنين الضالي والمجزوم
وصوت رصاص
وداب في عينا باقي النوم
وإطرت كلام {لاسوب}
(راجل حكمه في سنكات)
يوم قال ليها :
(انو هناك في الخرتوم
بتلقي الناس مكرفسه في بتون أربات
ولافه تهوم ..)
ولآمت فيها حاج {لاسوب}
لأنو أساس ..
نس ما يقول عن الرصاص
ولا قال ليها إنو الناس
شايله هناك رشاشات
ولافه تحوم ..
وندمت انه في الخرطوم
بصحو بيوتا بالرصاص
نفس الحلمه صبحت صاح
النعجات عليها قرون
تنطح مره في الماشين
وتنطح مره في كلتوم
نفس الحلمه صبحت صاح
وكل نعيجه شايله سلاح
بدل ما كان عليها قرون
تنطح مره في الماشين
وتنطح مره في كلتوم
نفس الحلمه صبحت صاح
* * *
حليل كلتوم .. تقاوم كيف ؟
شايله في ايديها هبابات .. ومقشاشات
وكيف تصمد مع النعجات
وشايلة معاها رشاشات
يا هو مصيرها دا المحتوم
وهو الجايالو من سنكات
ومترجيها في الخرطوم
دا هل معقول ؟
متل كلتوم يموت بسلاح
وينزل من جنيبه دموم
نفس الحلمه صبحت صاح
يرحمك الله يا كلتوم
حتى الدنيا ليكم انتو ما بدوم
شوفو الطيبه في كلتوم
ينزف من خشيما دموم
وحالفه تكمل المشوار
تقول للرشه فيها النار
" أليك اسم الله يا ولدي
دهين ما شفت لي هَلُّومْ "
تقول في ضيق
ونازلات من خشيما دموم
" جيت الليله من سنكات
وجبت مآي هبابات ومقشاشات
وديلا أمانه في راسك
توسلم إنت لي هَلُّومْ "
شوفو الطيبه في كلتوم
ونفس الزول
وقلبه الما برق لي زول
نزّل في حشاها سموم
سدد ليها كم طلقات
نزف الدم قليب كلتوم
وماتت بي إيدين نعجات
قرونا سلاح
عشان الحلمه تصبح صاح
حقيقة الدنيا ما بتدوم
متل كلتوم
تموت في ابشع الميتات
تموت في قليبها إشراقات
تموت في ايديها هبابات ومقشاشات
سفر كم يوم
تردح فيه من سنكات
تسلم روحها في الخرطوم
بسم الله الرحمن الرحيم
"لا تدري نفس ماذا تكسب غداً ولا تدري نفس بأي ارض تموت "
صدق الله العظيم
كمين ماتو زي كلتوم
ناس طيبين
وعُزّل برضو زي كلتوم
برضك ماتو بالرصاص
* * *
نقرأ ليهم الإخلاص
ونقرأ الفاتحة لي كلتوم
* * *
نفتش لي بنيتا ديك
نقول ليها الوصايات ليك
ونترحم علي كلتوم
يرحمك الله يا كلتوم

_____.wmv

شارك هذه المشاركة


الرابط الخاص بالمشاركة
مشاركة المحتوى على مواقع أخرى

انشئ حساب جديد او قم بتسجيل دخولك لتتمكن من اضافه تعليق جديد

يجب ان تكون عضوا لدينا لتتمكن من التعليق

انشئ حساب جديد

سجل حسابك الجديد لدينا في الموقع بمنتهي السهوله .


سجل حساب جديد

تسجيل دخول

هل تمتلك حساب بالفعل ؟ سجل دخولك من هنا.


سجل دخولك الان