اذهب للمحتوى


اهلا بكم فى مكتبة الأغنية السودانية

اهلا بكم فى مكتبة الأغنية السودانية, مثل جميع المواقع على الانترنت يجب عليك التسجيل للمشاركه في الموقع ولا تقلق فهى عملية سهلة , اشترك هنا or ان كنت عضو سجل دخولك من هنا وانظر بالاسفل للتعرف على مميزات الاشتراك.

  • وضع مواضيع جديدة والتعليق على مواضيع الاخرين
  • تشترك فى المواضيع والمنتديات لتعرف اخر التجديدات
  • تضيف احداث جديدة للتقويم الخاص بك
  • تحصل على ملف شخصى خاص واصدقاء
Guest Message © 2017 DevFuse

هاشم صديق "بركة الشيخ"


  • لا يمكنك الرد على هذا الموضوع
1 reply to this topic

#1 جميله

جميله

    نائب مدير الموقع للشئون التقنية

  • PipPipPip
  • 2396 مشاركات

تم الارسال 29 April 2010 - 01:14 PM



(رجل وزوجته.. يتناولان وجبة العشاء..وجهاز التلفزيون أمامهما وهو يصدر ضجيجاً وهو يعرض ويبث برنامجاً عن الإنتخابات)

الزوجة : إنت ياعادل صحي دايرتنا دي.. المؤتمر الوطني جابها كلها.. مية في المية؟؟

الزوج : أيوه

الزوجة : ولا زول واحد أدى الشعبي.. ولا الإتحادي الديمقراطي الفصل.؟

الزوج : إسمو الإتحادي الديمقراطي الأصل.. مش الفصل.

الزوجة : ما يا هو حزب ناس سيدي..يلحقني ويفزعني الجدو النبي.. قلت ليك..صحي المؤتمر الوطني جابها مية في المية

الزوج : قالوا كدا.. مية في المية

الزوجة : ( محتجة) أجي يا بنات أمي . بس كيفن يعني ولا واحد في الدايرة دي ما دايرهم؟!.. هسه إنت ده ياعادل مش أديت صوتك للتحالف.. أها .. كيف يعني تبقى مية في المية

الزوج : ( مرتبكا).. لكن .. لكن أنا ما أديت التحالف

الزوجة : أديت منو؟

الزوج : الشجرة

الزوجة : (تضرب بيدها على صدرها وهي تصرخ) سجمي .. سجمي ياعادل.. بعد الصالح العام.. والإعتقالات.. و....

الزوج : أعمل شنو يا آسيا..ماسك القلم.. القلم طار من يدي.. عمل صاح للشجرة ورجع ركّ في إيدي تاني..

الزوجة : ( فزعة): سجمي.. شعرة جلدي ..كلّبت.. يلحقني ويفزعني.

الزوج : أبو هاشم

الزوجة : لا..البشير

الزوج: ( وكأنه يجد الفرصة ليسألها) أها ااا .. وإنتي ذاتك مش أديتي حاتم السر.. أها ااا ..تبقى كيف النتيجة مية في الم ي ي ي ية ؟!

الزوجة : أ..أنا ..أنا ما أديت حاتم

الزوج : أديتي منو؟!

الزوجة : الشجرة

الزوج : ( يصرخ في وجهها) أديتي الشجرة يا آسيا..بعد الصالح العام الأحالوني ليه..والإعتقالات.. وعذاب العيشة..و..

الزوجة : أعمل شنو ياعادل.. من ما مسكت القلم.. أسمع ليك صوت يوسوس لي في أضاني..أدي الشجرة يا آسيا.. عليك بالشجرة يا أسوووية...

الزوج ( محتارا) : شيء عجيب الحصل لينا دا

الزوجة : غايتو اليوم داك.. كان يوم غريب.. تخيل يا عادل.. كلتوم جارتنا.. مرقت من بيتها ماشة أمبدة.. حلفت قالت ركبت مواصلات السوق الشعبي.. ما لقت روحها إلا راكبة مواصلات الشجرة

الزوج : ( يهز رأسه في حيرة) يا ربي فيهم شيء لله الناس ديل؟! ( يسرح قليلاً) صحي هم مما جو يكوركو هي لله..هي لله

الزوجة : لا للسلطة ولا للجاه (وكأنها تهتف)

الزوج : لكن كمان الجاه والسلطة اللقوها الناس ديل.. فرعون وقارون لقوها ؟

الزوجة: (تلتفت لصينية العشاء أمامهما) هي كدي.. خليك... منهم أُكل..أُكل.. الأكل برد.

الزوج : (يضحك) كل يوم فول

الزوجة : الليلة معاهو بيض مسلوق( تصمت للحظات وهي تنظر للصينية بتركيز ثم تنتابها حالة من الرعب) : عادل

الزوج : شنو؟

الزوجة : عاين للبيضة دي ( تمسك بالبيضة وترفعها أمام عينه بيد راجفة) شوف.. شوف فيها شنو؟

الزوج: (يمعن النظر) ما.. شايف حاجة

الزوجة : أجي ياعادل.. عاين كويس.. البيضة دي.. مش مرسوم فيها شجرة؟

الزوج : ( يمعن النظر أكثر) تقصدي الحاجة دي؟!!

الزوجة : آآي

الزوج : ( ينفجر ضاحكاً) دي مش جرجيرة إتلصقت في البيضة؟!..إنتي تتفلسفي فارشة الجرجير فوق للبيض.. تقولي لي شجرة مرسومة في البيضة؟!

الزوجة : سجمي..سجمي.. الناس ديل وهمونا.... لما بقينا نشوف الشجرة في سقف الاوضة؟!.



232.jpg

 

واااحي من جرحك الدامي
وفتر حيلك
واااحي من ضلك الرامي
وحمل شيلك
تموت متل الشدر واقف
تموت واقف علي حيلك
فيا حليلك
ياحليلك

 


#2 يوسف الموصلي

يوسف الموصلي

    الأستاذ و الموسيقار

  • PipPipPip
  • 1822 مشاركات

تم الارسال 17 May 2010 - 07:37 AM

التحية للشفيف هاشم صديق





1 عضو(اعضاء) يشاهدون هذا الموضوع

0 الاعضاء, 1 الزوار, 0 مجهولين

Site supported By GazaSoft.com