• Announcements

    • Gamiela

      ضيوفنا الكرام   06/21/2017

      اعلان هام - فتح جميع منتديات المكتبة للزوار دون الحاجة للعضوية http://www.sudanesesongs.net/ قمنا اليوم بفتح المكتبة لجميع الزوار لتنزيل جميع الأغاني التي جمعتها المكتبة عبر السنين ...
      كان الحلم ان يأتي هذا اليوم في حياة الصديق الراحل المقيم عادل خليفة ...
      خطفه منا القدر ... و لكنا الان نوفي بالوعد ...
      الان و دون الحاجة للتسجيل او العضوية ...
      يمكن لجميع الزوار الاستمتاع بمواد المكتبة الغنائية و التي تصل في حجمها الى اكثر من 500 جيجا بايت
      فقط اضغط على الرابط للوصول للمكتبة ...
      ثم ابحث عن جيل فنانك المفضل و تابع الحرف الابجدي ... بعدها ستصل الى جميع المواد متاحة دون الحاجة للاشتراك ... للتنبيه ... فقط أعضاء المكتبة الذين يمكنهم ( رفع ) المواد للمكتبة و مازال باب العضوية متاح لكل من يريد رفد المكتبة بمواد جديدة .. و كل عام و جميع اهل السودان بخير و عافية   عن إدارة و مشرفي و أعضاء مكتبة الأغنية السودانية يحيى قباني المشرف العام http://www.sudanesesongs.net/
Sign in to follow this  
Followers 0
Gamiela

الأستاذ هاشم صديق " القناة لا تعمل ..أو مشفّرة"

1 post in this topic

(شاشة التلفزيون)

 

مقدم البرنامج:ـ المشاهدون الأعزاء في هذه الحلقة من برنامج صحتك النفسية والعصبية نواصل استضافة الدكتور سالم سليم سلام اخصائي الأمراض النفسية والعصبية للرد على استفساراتكم وشكاويكم العصبية والنفسية و...(يتوقف عن الحديث للحظات) معذرة... معانا تلفون...ألو...ألو

صوت إمرأة:ـ إنتو ما عندكم صبر يبل الآبري ...الموبايل يضرب وأنا في المطبخ واجي جارية القي الخط قطع والراجل القاهو بقول صاحب الرقم ما برد... نشوف رقم تاني...حسع يمكن انا الكسبت الجائزة .. وحاة الله أنا الكسبتها عشان أنا ماعرفت رقم الزول الاتصل... مش معناهو ياهو...

مقدم البرنامج:ـ (يقاطعها) إنتي عايزة الفترة المفتوحة في الفضائية السودانية ... وده برنامج صحتك النفسية والعصبية في فضائية الحرية

صوت المرأة:ـ أجي؟!! اسمها الحرية ..وبقت لي ناس النفسية والعصبية ؟و...(ينقطع الصوت)

مقدم البرنامج:ـ اضطرينا نقطع المكالمة كسباً للوقت... ومعذرة يادكتور... ممكن نتكلم في موضوع أثر الضغوط النفسية والعصبية في اتخاذ القرارات المتسرعة وغير المدروسة كما وعدنا المشاهدين في الحلقة الماضية ...اتفضل يا دكتور

الدكتور:ـ شكرا (يبتسم) طبعاً زي ما هو معروف طبيعة العصر العايشين فيهو... بتخلي الإنسان بعيش في كثير من الضغوط النفسية والعصبية وطبعا...

مقدم البرنامج:ـ (يقاطعه) معذرة يا دكتور ... الظاهر معانا تلفون...نسمعو ونرد عليه ..وبعدين نواصل...الو ...الو

صوت :ـ الو..السلام عليكم

مقدم البرنامج:ـ (مبتسما) وعليكم السلام

الصوت :ـ لو سمحت عندي استفسار

مقدم البرنامج:ـ(هاشاً) إتفضل

الصوت:ـ قطر كريمة بصل الساعة كم؟!

مقدم البرنامج:ـ يا اخوي انت عاوز وين؟!

الصوت:ـ دي مش استعلامات السكة حديد؟!!

مقدم البرنامج:- (ضائقاً) يا خوي دي قناة الحرية الفضائية.. برنامج صحتك النفسية والعصبية.

الصوت:- معليش أنا آسف

مقدم البرنامج:- (في توتر شديد) معذرة يا دكتور.. حاجات غريبة فعلاً (يزفر في ضيق) نواصل الحديث يا دكتور.

الدكتور:- معليش ولا يهمك (يواصل الحديث) أنا كنت بقول زي ما هو معروف طبيعة العصر العايشين فيهو بتخلي الإنسان... (يقاطعه صوت)

الصوت:- ... ألو ... ألو السلام عليكم

مقدم البرنامج:- .. وعليكم السلام

الصوت:- فضائية الحرية.. برنامج صحتك النفسية والعصبية؟!

مقدم البرنامج:- (في ارتياح) أيوه.. مرحب حبابك

الصوت:- ياخي أول حاجة عاوز أعتذر ليكم نيابة عن المشاهدين عن السخف الحصل قبل شوية، يعني مش معقول واحدة عاوزة الفترة المفتوحة في الفضائية السودانية.. تقوم تتصل بفضائية الحرية....

مقدم البرنامج:- (موافقاً في ارتياح) بالله مش حاجة غريبة.

الصوت:- طبعاً حاجة غريبة... مش معقول الواحد يكون عاوز إستعلامات السكة حديد.. يقوم يتصل بقناة الحرية... ناس كتيرة حسع بكونوا على الخطوط منتظرين وعاوزين يسألوا أسئلة عندها علاقة بطبيعة البرنامج.

مقدم البرنامج:- معليش ياخي شكراً على روحك الجميلة.. وعلى وعيك.

الصوت:- العفو... ممكن أسأل الدكتور سؤال مهم

مقدم البرنامج:- إتفضل

الصوت:- أنا الإنتخابات الجاية دي .. عملت لي مشكلة نفسية.. راسي داير يطير يا دكتور

الدكتور:- ليه؟

الصوت:- رمز الشجرة ده.. مش هو أصلو طالع في الشجرة عشرين سنة.. ما نزل منها؟! بعدين إنتو عايزين تجننونا؟ كيف يعني الرئيس الشرعي المنتخب الشالوهو بإنقلاب حسع نازل إنتخابات ديمقراطية ضد الزول الشالو... يعني حسع رمز الشجرة ده لو فاز وبقى رئيس منتخب ديمقراطياً.. وجا واحد شالو بإنقلاب عسكري حيكون هو الرئيس الشرعي المنتخب الإنقلبو عليهو؟!.. وتاني كمان نبقى في ...

مقدم البرنامج:- (مقاطعاً في توتر) يا... ياخي.. ده موضوع... تجاني الماحي... أأ .. أقصد سياسي ما عندو علاقة ببرنامج صحتك النفسية والعصبية و...

الصوت:- (يقاطعه صارخاً) هو الصحة النفسية والعصبية دي بس إلا تكون شواكيش في الحب؟! ... بعدين أنا برضو داير أسأل.. كيجاب ما نازل إنتخابات ليه؟؟ ... مش كيجاب بعوم في البحر ... وديل بعومو في البر؟.. وكمان برضو داير أسأل.. واحد من المرشحين قال في برنامجو الإنتخابي.. نعتذر لناس دارفور.. هو ده مرشح ولا إسحق الحلنقي.. وكمان برضو...

(فجأة تظلم الشاشة)

وبعد ثوان تظهر كلمات تقول:-

(القناة لا تعمل... أو مشفّرة).

Share this post


Link to post
Share on other sites

Create an account or sign in to comment

You need to be a member in order to leave a comment

Create an account

Sign up for a new account in our community. It's easy!


Register a new account

Sign in

Already have an account? Sign in here.


Sign In Now
Sign in to follow this  
Followers 0