• إعلانات المنتدى

    • Gamiela

      ضيوفنا الكرام   21 يون, 2017

      اعلان هام - فتح جميع منتديات المكتبة للزوار دون الحاجة للعضوية http://www.sudanesesongs.net/ قمنا اليوم بفتح المكتبة لجميع الزوار لتنزيل جميع الأغاني التي جمعتها المكتبة عبر السنين ...
      كان الحلم ان يأتي هذا اليوم في حياة الصديق الراحل المقيم عادل خليفة ...
      خطفه منا القدر ... و لكنا الان نوفي بالوعد ...
      الان و دون الحاجة للتسجيل او العضوية ...
      يمكن لجميع الزوار الاستمتاع بمواد المكتبة الغنائية و التي تصل في حجمها الى اكثر من 500 جيجا بايت
      فقط اضغط على الرابط للوصول للمكتبة ...
      ثم ابحث عن جيل فنانك المفضل و تابع الحرف الابجدي ... بعدها ستصل الى جميع المواد متاحة دون الحاجة للاشتراك ... للتنبيه ... فقط أعضاء المكتبة الذين يمكنهم ( رفع ) المواد للمكتبة و مازال باب العضوية متاح لكل من يريد رفد المكتبة بمواد جديدة .. و كل عام و جميع اهل السودان بخير و عافية   عن إدارة و مشرفي و أعضاء مكتبة الأغنية السودانية يحيى قباني المشرف العام http://www.sudanesesongs.net/
omer_mutasim

مصطفى سيد احمد :اه يا غبش"

عدد ردود الموضوع : 1

آه …يا غبش

 

محمد الحسن سالم حميد

 

آه يا غبش…

ما عندي ليكم غير نغيم…برجوه ينفض لي غبار زمن القسا… الكتاحة

يهز عرجون نخل صبر الغلابة الطال…يحث يخرت…تباريح الأسى الممدودة فوق نور الدغش…

يا نـــــــورا آه…

يجرد كنائسنا المسيح… يعرش مدارسنا الصدى… ييبس يباس

حلق العصافير الوديعة من البكا….إندرد الصوت البعيد…أسيان تصر من دون صدى

ينكفرن الفجر الصبوح.. يحمي الزهيرات الندى

تختا الدراويش الضريح…يسكن خلاوينا الجنون…..يهجر جوامعنا الإله…

يا نـــــــورا آه…

تطرح غيوم الشوق تئن…

تشرق ..

تموت

خيل … كلمة الحق التناهد في الشفاه…يعقر بسيمة الصح مع لوبي الجروف

تغرز ضريعات الحروف…ينشف مراح الأمسيات…

تتمطق الأرضة المروق والأغنيات…

اللي الشروق…والأرض

والحب

والمطر

تضهب تتوه…

وكتين يضيع عرق الجباه الشم…شمار في مرقة…

آه يا نـــــــورا آه…

من دربك التور نفس خيل الصبر…فتر خطاوي الشوق وراه…

يا نـــــــورا آه…

ساعة الشموس الغر… تهضلم....تلحق الصح في المغارب…

تدفر الضو الكهارب…في وشيك…تدفر المدن الضبابية.. السرابية الكآبة

وحائط التيه والطشاشات فوق قفيك

يا ام عوارض… مو دعاشة

ماها شبورة وتقيف

جاي ليك يا نورا غيمة…

تملا ماعونك خريف… يملا عينيك ويفضل…يروى جواك… العطاشة

مو دعاشة

 

يا المراكبية البتجبد.. من فك الموج الغريق

يا الجزاير النتحويبا… لما إنشعوز بحرنا

يا نشوغ روحنا ودمرنا……يا المحطات الحنينة… القصرت مشوار سفرنا

 

يا ما شايلك بيني حايم…..أيوة شايلك … بيني حايم

في الأرض تكون قضية…في السما الأحمر .. غمايم

بي برد نغما السلامي…رطبت حلق الحمائم

طنبر النخل التبلدي… راقص الأبنوس وصفق

سوت الصقرية موجة … خلت النيل هاجلو هوجة… بشرت بالخير بلدنا..

شالت الشبال نسايم… جددت زلفى القديم

أمشي بي الماشيبو اقاوم… لا بتكبر راسي فورة.. لا بتصغرني الهزايم

جنس يا نورا ابن آدم… حلمو في عالم مسالم

لا الليالي الماها ليا… لا الشماتات العليّ

لا البنوك المخلية… لا تفاهات الحضارة…

لا عفاريت المدينة… لا العمارات السوامق…

فوق ضهر ناساً فقارى…. لا الهتاف الفاوة ضاري… غطى بالي من الفوارق

لا الألوف الطمطمية…لا البرندات الوسيمة…ولا الأسامي الأجنبية…

بتمحي من عيني ملامحك… وإنتي حاية المغربية

جاي دايخي المغربية…

وشك المقبول مكندك… سامسونايتك زمزمية

كونشبر…

مرزبة

مقطع

ريشة فانوساً مدردح..

قلت بيهن لي زمانك… يا زمان الحاجة عندك…. يا زمان الحاجة حدك

لا تطا الوردة الصبية

 

 

يا نفس فجر القصائد… يا بلادي القطع قلب الروادي…

باللواج الجاي وغادي…

دخ ناهو صوتك

لاها صورتك…دي البترقش

نادي فوق صدر الجرايد

ماها صورتك!!!

لا هو صوتك

لا ها صورتك!!!!

إنتي يا الفي إطن الصحاري

شفع العرب الفتاري

البفنو الشايلا إيدن… ويجروا كابسين القطارة… يجروا باريين القطارة

لا سراب الصحراء موية… لا حجار سلوم موائد

إنتي في الغابة اليصارع… جوفوا للآهات تلكي

ياما دفق غيم رجاهو… لكن الأيام كركّي

في خلا حالنا اليمحن… ويملأ بالسهد الوسائد

إنتي غيمة

شديرة….خيمة

إنتي جاهنا..

والتقا الطلقت وشينا…فرقت غمة جباها…فرجت في الحارة ضيفنا…فرحت شفع فريقنا

يا النغيم البق فينا… وشد لي وتر إنتباهنا

يا تباشير

يا بشارة…

إنتي يا ضرعاً تكرمش..شان يرضعني الجسارة…

إنتي في منفاي رفيقة…وفي حشا الأشواق حرارة…

يا هدى الناس الحياري…يا ندى الفجر اليبلل…صور عوينات الفقارى

جاي ليك…

آه جاي ليك يا نــورا آفة..

آفة للسوس الجا ينقر…

عود عشيماً داخرو فيك..وأصلي لمن ادور أجيك…لا بتعجزني المسافة

لا بقيف بيناتنا عارض… لا الظروف تمسك في إيدي..

ولا من الأيام مخافة…

يا نفس فجر القصائد..ما ضهب في بعدي عنك

واصلي متغرب عشانك

راضي بالبيجيني منك

ما بكيت شح الليالي…لا شكيت نح.. شلتو حالي

رغم إنو الحال بيفسخ…..إلا كت في الحارة بنده

يا وطن عز الشدائد..

يا وطن عز الشدائد…

شارك هذه المشاركة


الرابط الخاص بالمشاركة
مشاركة المحتوى على مواقع أخرى

انشئ حساب جديد او قم بتسجيل دخولك لتتمكن من اضافه تعليق جديد

يجب ان تكون عضوا لدينا لتتمكن من التعليق

انشئ حساب جديد

سجل حسابك الجديد لدينا في الموقع بمنتهي السهوله .


سجل حساب جديد

تسجيل دخول

هل تمتلك حساب بالفعل ؟ سجل دخولك من هنا.


سجل دخولك الان