• إعلانات المنتدى

    • Gamiela

      ضيوفنا الكرام   21 يون, 2017

      اعلان هام - فتح جميع منتديات المكتبة للزوار دون الحاجة للعضوية http://www.sudanesesongs.net/ قمنا اليوم بفتح المكتبة لجميع الزوار لتنزيل جميع الأغاني التي جمعتها المكتبة عبر السنين ...
      كان الحلم ان يأتي هذا اليوم في حياة الصديق الراحل المقيم عادل خليفة ...
      خطفه منا القدر ... و لكنا الان نوفي بالوعد ...
      الان و دون الحاجة للتسجيل او العضوية ...
      يمكن لجميع الزوار الاستمتاع بمواد المكتبة الغنائية و التي تصل في حجمها الى اكثر من 500 جيجا بايت
      فقط اضغط على الرابط للوصول للمكتبة ...
      ثم ابحث عن جيل فنانك المفضل و تابع الحرف الابجدي ... بعدها ستصل الى جميع المواد متاحة دون الحاجة للاشتراك ... للتنبيه ... فقط أعضاء المكتبة الذين يمكنهم ( رفع ) المواد للمكتبة و مازال باب العضوية متاح لكل من يريد رفد المكتبة بمواد جديدة .. و كل عام و جميع اهل السودان بخير و عافية   عن إدارة و مشرفي و أعضاء مكتبة الأغنية السودانية يحيى قباني المشرف العام http://www.sudanesesongs.net/
ابو متوكل

سنة 83 ... رحلتي للفاشر أبو زكريا ... يا سلااااااااااام ....

عدد ردود الموضوع : 12

الاجازة المدرسية ...

 

 

قلت يا ولد ... أحسن شي تمشي تزور أختك في الفاشر ..

 

قلت لجدي (علية رحمة الله) ولأبوي (الله يطول في عمرو ويديو العافيه) ...

 

قالوا لي كويس .. تشوف الغرب ..

 

بس أبوي قال لي بوصيك ما تأكل لحم الصيد ... لانو جديد عليك ...

 

المهم كلمت عمي يعمل لي تصريح (عمي مراجع في الجزيرة بورد) ...

 

والتصريح ... دا ... شي متعارف به بين هئية سكك السودان .. والقطاع الحكومي ..

 

بخفض ليك التذكرة ... يعني تدفع ربع المبلغ ...

 

المهم ... عملت كل التجهيزات للسفر ... والوالده (الله يطول في عمرها ويديها العافية) ...

 

عملت كل الزواده ... والكعك والخبيز ... بالكراتين ... عشان ما امشي لأختي يدي فاضيات ..

 

وطبعاً يا أخونا دي .. أول مره أركب فيها القطر ... وأول مره اعدي ود مدني ...

 

المهم يوم الاثنين .. ركبت التاكسي .. ومشيت الحصاحيصا ... عشان أركب القطر منها ..

 

وفي التاكسي قابلت واحد بلدياتنا ... وزول سفر كتير للغرب ... المهم سألني ماشي وين قلت ليو ..

 

ماشي نيالا بالقطر ... قال لي .. شوف خلي اخلاقك في نخرتك وخليك قطيم في القطر ...

 

لانو الزول المسكين حقو بروح في القطر ... المهم سمعتا كلامو ...

 

المهم وصلنا الحصاحيصا .. ونزلت مع صحبانا ... واتغديت معاهم ..

 

لانو القطر بتحرك الساعة 3 ظهرا وطبعا الوالد الله يديو العافية ...

 

كان مكلم لي وكيل بريد الحصاحيصا .. عشان يكلم لي ناظر المحطة ...

 

المهم عمنا الوكيل كلم ... ناظر المحطة ... والراجل ماقصر ... بالذات كانت في زحمة

 

شديدة لانو في الاسبوع في رحلتين لنيالا ... والظاهر رحلة الخميس اتلغت لعطل في القطار ...

 

الساعة 3 ظ ... ركبت القطر .. في القمرة المجاوره لمكتب الكماسرة .. والسواقيين ......

 

وتحرك القطر من محطة الحصاحيصا ..

 

 

نوااااااااااااااااااااصل ... إن شاء الله .. كان الله مدا في الارواح ( بس ما حقت أحمد البلال الطيب هاهاهاهاها )

شارك هذه المشاركة


الرابط الخاص بالمشاركة
مشاركة المحتوى على مواقع أخرى

واصل ياراجل يا زوق انت

 

وبعد ما تنتهي باقدر اقارن بين السفر باللوري والقطر

 

شخصي الضعيف سافر باللوري من الخرطوم الى الفاشر يوم 29.06,1989

 

يعني يوم واحد من انقلاب الجبهجية

 

 

كلام البلال دا خليك منو وواصل بطريقتك السردت بيها :)

 

لك ودي

شارك هذه المشاركة


الرابط الخاص بالمشاركة
مشاركة المحتوى على مواقع أخرى

لك التحية ابو متوكل

الظاهر انو القصة دي حتكون جميلة جدا

مع تحيات معلم الحوت

تخريمة : مشتاقين

شارك هذه المشاركة


الرابط الخاص بالمشاركة
مشاركة المحتوى على مواقع أخرى

يا هـــــــــــــــــــــــلا بالأعـــــــــزاء .. الزول والحــــــــــــوت ..

 

لكما مني عاطر التحايا ..

 

وجودكما يمتع البوست ...

 

عمييييييييييق ودي ...

 

 

تخريمة :

 

الحووووووووت شنو يا معلم متابعني من البوكسي للقطر هاهاهاهاهاهاها

 

كنا ... داخل القمرة .. 11 شخص ... والقمرة تتكون من 4 سراير زي ...

 

سراير الداخلية ... كل اثنين فوق بعض ... يعني القمرة .. معموله لعدد 4 أشخاص ..

 

المهم ... كان معنا عم عثمان (عثمان دا في عمري ... وبقا صاحبي) ...

 

عم عثمان عشان مريض .. وعامل عملية (شايل اللوز) .. الجماعة قالوا ...

 

يشيل السرير الفوق ... باقي 3 سراير ... على طول ما كضبت ...

 

واتذكرت كلام بلدياتنا (خليك قطيم) .. طلعت السرير الفوق ... واحتليتو ...

 

وطلعت كتاب (الف ليلة ولية) كان معاي .. وبديت أقرأ فيو ... عملية تكسير للوقت ...

 

المهم خليت صاحبي عثمان يشاركني السرير .. وباقي السريرين ..فيهم ال 8 أشخاص ..

 

كل 4 في سرير طبعا مصنقرين .. وكلهم تجار .. بتاجروا بين الخرطوم وغرب السودان ...

 

ما عدا .. واحد ... من رجل الفولة في غرب السودان ... كان قادم من العراق ...

 

ديل الجماعة السفرهم الرئيس السابق نميري .. لمسانده نظام صدام في حربه مع ايران ...

 

واذكر اسمهو (جمعة) كان شخص معتز بلبسه العسكري .. والظاهر ما داير يغيرو ...

 

حتى يصل لبلده ويشوفوا أهل بلده بلبسه العسكري ... وأنا اقول لنفسي ديل ذنبهم شنو ..

 

يسافروا للعراق ويحاربوا لجانب صدام .. وفي النهاية يرجعوا بلس عسكري ... وحلة كتوش ...

 

طبعا أخونا جمعة اشترى حلة (كتوش) شايلها لاهلو ... طبعا حلة (الكتوش) دي حلة بتتعمل من ..

 

صب الفضه ... وهي حلة جيدة لعمل اللقمة (العصيدة) بتخليها تنجض بطريقة كويسة وما بتمسك ...

 

اللقمة في الحلة ... وايضاً بتسمى حلة (الزايعات) ..المهم الحلة دي نفعتنا في الميز الذي عملناهو .. في القمرة ...

 

 

 

نواااااااااااااااااااااصل .... إن شاء الله ... وحسب طلب الغالي الزوووووول خلينا بتاعت أحمد البلال الطيب

 

بالمناسبة .. أسمي الحقيقي : أحمد عوض البلال ... ( صدفة غريبة ) هاهاهاهاهاها

شارك هذه المشاركة


الرابط الخاص بالمشاركة
مشاركة المحتوى على مواقع أخرى

يا احمد عوض وابو متوكل انا وراك فى اي حتة

لحدي النهاية

 

لانو قصصك جميلة ومشوقة

شارك هذه المشاركة


الرابط الخاص بالمشاركة
مشاركة المحتوى على مواقع أخرى
يا احمد عوض المره دى انا متابع معاك كويس ;);) بس انا شايفك بديت (تخمنا) اكى براااحه براااحة وبعدين المفردات السمحه دى اقيف فيها اكتر فى شرحها عشان عيون اطفالنا ما تضوق الهزيمة ;);)

احيييييك

 

احييييييييييك ما بتحينا ... نرضيك ما بترضينا ..

 

قلت لي متابع معاي .. الله يستر ما تكون مسطح .. هاهاهاهاهاهاها

 

يا زول القطر ما بخم .. البخم الله يعلم بيو الدفاااااااااااااااااار ( موش بقولوا الدفار خما الشباب للالزامية هاهاها ) ..

 

وبخصوص المفردات يا حبه .. أطفالنا .. ولا أنت ذاتك مسطح فيها .. قال: أطفالنا قال .. هاهاهاهاها

 

جادي يا حبيبنا جمال .. اي مفرده بترى محتاجه لشــــــــــرح أخوك جاهز ...

 

دمتى ودام صفاءك ...

 

 

 

 

يا احمد عوض وابو متوكل انا وراك فى اي حتة

لحدي النهاية

 

لانو قصصك جميلة ومشوقة

 

معاي معاي بالحوووووووت الطويل هاهاهاها

 

هلا وحبااااااااااابك .. وجودك ليو رونق يا حوووووووووت ..

 

هسي جبت سيرتها أختنا( جميلة ) تجينا ناطه تقول ليك وقفو لي القطر دا لانو فاتني الله يستر ما ترجعنا للمحطة الأولى هاهاهاهاها

 

عمييييييييييييييق ودي ..

شارك هذه المشاركة


الرابط الخاص بالمشاركة
مشاركة المحتوى على مواقع أخرى

ابو متوكل الحاصل شنو ؟

القطر ده اتعطل ايجيك ولا مافي داعي

تخريمة :

اخبارك شنو مشتاقييييييين

شارك هذه المشاركة


الرابط الخاص بالمشاركة
مشاركة المحتوى على مواقع أخرى

جمال دفار ماتشوف القطر ده نحنا اتخرنا ولا نشوف بوكسي ولا اي حاجة

شارك هذه المشاركة


الرابط الخاص بالمشاركة
مشاركة المحتوى على مواقع أخرى

خلاص يا محسي غيرو سريع عليك الله

شارك هذه المشاركة


الرابط الخاص بالمشاركة
مشاركة المحتوى على مواقع أخرى

أخواني الأعزاء

 

آآآآآآآآآآآآآآآآآآآآآآآآســــــــــــــف كتير للتأخير ..

 

لكن ما مني .. من العلي ...

 

اصلو العلي ما مر يوم ولا طاف بخيال بشر ..

 

كتر خيرهااااااااااااااا بت القبائل (( جميلة )) .. فكت لي العمل الكان معمول لي كان ما نعني اجي حلتكم دي ..

 

لكن ما تقول لي يا (( جميلة )) .. ما لقيتك شيخة كبيرة .. بركااااااااااااااتك

 

طبعا أخواني طيل فترة الغياب كنت ما قادر ادخل للمنديات ...

 

وإن شاء الله نواصل وما ننقطع ..

 

برجع ليك واجيكم .. ونكلم المشوار ...

شارك هذه المشاركة


الرابط الخاص بالمشاركة
مشاركة المحتوى على مواقع أخرى

طعبا الكلام دا سنة 83 ..

 

بس إن شاء الله اتذكر الباقي ..

 

اها بسم الله نوااااااااااصل

 

الحووووت أخوي .. وقفنا في ياتو محطة ؟؟؟ :D

شارك هذه المشاركة


الرابط الخاص بالمشاركة
مشاركة المحتوى على مواقع أخرى

قبل المغرب وصلنا لمحطة مدينة ود مدني ...

 

وتحركنا منها قبل العشاء ... في طريقنا لمحطة سنار التقاطع ...

 

اها بدينا موضوع العشاء ... أخوكم فتح الزواده ..

 

في لحظتها تم نسفها (قلت إن شاء الله تنفعهم) ..

 

وبعدها في واحد اشترى باسطة من المحطة ... وضربنا الباسطة ...

 

المهم في الليل استدعونا ..

 

الكماسرة في القمرة المجاورة لقمرتنا كل شخص على حده ...

 

التقول تحقيق أمني (كراهيتي في الدنيا ناس الأمن) ..

 

وكان الموضوع ...

 

قروش التذاكر .. المهم عندما تم استداعي ...

 

دخلت وسلمت على المفتش وكبير الكماسرة ...

 

المهم قالوا لي قروش التذكره ..

 

قلت ليهم معاي تصريح من إدارة مشروع الجزيرة ...

 

ردوا على تصريح مشروع الجزيرة موقوف ...

 

لانو هئية السكك طالباهم مبالغ مالية ما سددو العليهم عشان كده ...

 

وقوفوا التعامل بتصاريح مشروع الجزيرة ..

 

بحركة زعل وحماقة وهاشمية الشباب .. اقطع التصريح ..

 

قدام المفتش وكبير الكماسره ..

 

وتعال شوف .. كلامهم الصعب ..

 

دا استفزاز منك ود استهتار كيف تشرط ورق حكومة ...

 

المهم قاطعتهم جافاً ... موش قلتوا التصريح ما شغالين بيو ..

 

قالوا لي ايوا ...

 

قلت ليهم ولا كلمة زيادة ... مطلوب مني حق التذكرة كاملاً وبس ..

 

الظاهر المفتش كان زول هادي شوية ...

 

قال ليو معليش اصلوا الشباب في الفترة دي بستعجلوا وبتصرفوا بطريقة اندفاعية ..

 

المهم قاطعتهم المطلوب مني كم ؟ ... قال لي كبير الكماسرة 36 جنيهاً و75 قرشاً ..

 

اديتو 40 جنيها وقلت ليو شيل حقك ورجع لي الباقي .. بأسلوب حاد شديد ..

 

(طبعا متذكر كلام بلدياتنا خلي اخلاقك في نخرتك) ..

 

المهم ادوني التذكرة والباقي 3 جنيهات وطراده ...

 

اختهم وذهبت بدون ولا كلمة اعتذاري مني ...

 

لكن التصرف الجاف نفعني شديد حتى نهاية الرحلة ...

 

 

نواااااااااااااااااااااااااااصل ... إن شاء الله ...

شارك هذه المشاركة


الرابط الخاص بالمشاركة
مشاركة المحتوى على مواقع أخرى

انشئ حساب جديد او قم بتسجيل دخولك لتتمكن من اضافه تعليق جديد

يجب ان تكون عضوا لدينا لتتمكن من التعليق

انشئ حساب جديد

سجل حسابك الجديد لدينا في الموقع بمنتهي السهوله .


سجل حساب جديد

تسجيل دخول

هل تمتلك حساب بالفعل ؟ سجل دخولك من هنا.


سجل دخولك الان