• إعلانات المنتدى

    • Gamiela

      ضيوفنا الكرام   21 يون, 2017

      اعلان هام - فتح جميع منتديات المكتبة للزوار دون الحاجة للعضوية http://www.sudanesesongs.net/ قمنا اليوم بفتح المكتبة لجميع الزوار لتنزيل جميع الأغاني التي جمعتها المكتبة عبر السنين ...
      كان الحلم ان يأتي هذا اليوم في حياة الصديق الراحل المقيم عادل خليفة ...
      خطفه منا القدر ... و لكنا الان نوفي بالوعد ...
      الان و دون الحاجة للتسجيل او العضوية ...
      يمكن لجميع الزوار الاستمتاع بمواد المكتبة الغنائية و التي تصل في حجمها الى اكثر من 500 جيجا بايت
      فقط اضغط على الرابط للوصول للمكتبة ...
      ثم ابحث عن جيل فنانك المفضل و تابع الحرف الابجدي ... بعدها ستصل الى جميع المواد متاحة دون الحاجة للاشتراك ... للتنبيه ... فقط أعضاء المكتبة الذين يمكنهم ( رفع ) المواد للمكتبة و مازال باب العضوية متاح لكل من يريد رفد المكتبة بمواد جديدة .. و كل عام و جميع اهل السودان بخير و عافية   عن إدارة و مشرفي و أعضاء مكتبة الأغنية السودانية يحيى قباني المشرف العام http://www.sudanesesongs.net/
werlid

اختبار: لعشاق الحقيبة فقط...

عدد ردود الموضوع : 210

أغنية ثغر الزمان باسم كتبها الشاعر عبد المطلب حدباي عام 1932 في مناسبة زواج صديقه عثمان عيسى قاضي المحكمة الشعبية و التاجر المعروف وقتها بحي القوز

ثغر الزمان باسم

ثغر الزمان باسم و الريم بي شويدناتو في القوز يا زعم جاثم

يلا لي سوحن ننظر حكمة الراسم

شايم يا نديم ليهن خليك للأمور حاسم

و اهزم ضاري آلامك لي صبر الكرام لازم

متع طرفك الساهر و اطعم قلبك الآثم

و ان دار السرور بينن طف شام ندوتن قاسم

ظرفات حيهن بانت و الشوق اظهرو الكاتم

جن و النور مع نورن قشع ظلمة العاتم

كان الأول الأول عثمان للجبور خاتم

و اخلاق الكرام بانت عن أخلاق كرم حاتم

حيو المحمي ما حامت حولو مخيلة الظالم

قربو الما ختر عفوا حتى و لا علي حالم

يا زين الشباب شاهد ربك بالعلي عالم

من تأثير دويعجاتو في كل لحظة متآلم

أسواق الأدب راجت و اقدح يا ذهن ساهم

و اظهر غالي مكنونك و اشرح لا تكن واهم

قبضة الجاحم أيام الزمن جادت علت

و نارت ظلمة الجاهل و زادت خبرة الفاهم

 

يوجد لها تسجيل في المكتبة بصوت الفنان حيدر محمد أحمد - التحية للأخ محمد عوض السيد -

مع نبذة عن هذا الفنان هنا

 

 

 

 

شارك هذه المشاركة


الرابط الخاص بالمشاركة
مشاركة المحتوى على مواقع أخرى

تم النشر (تم تعديلها) · تقديم بلاغ

قصيدة حدباي السابقة... مجارية وزناً شعرياً... و موضوعاً...و لحناً... لواحدة من أجمل قصائد الحقيبة...

قصيدة وجه القمر سافر... للشاعر... مسعد حنفي

وجه القمر سافر

 

وجه القمر سافر يضوي شعاعو نور وافر

يا بدر سائلك جاوب ليش أخوك نافر

من حيو السباع تنتر و من رمشو السهم طافر

ريم يسحبلي سيف لحظو و آخر بالسلاح غافر

يا دمع أدفق ودع يا قليب سافر

شوقي بي طافر

هل بي نظرتك أظفر يا من بالقلوب ظافر

 

إعلم لولا ما طرفك لي البيض الرقاق شاهر

إنسان عيني كاد يغرق في ماء خدك الزاهر

نورك يتوقد  لعيون الخلوق جاهر

ظلمي شي ظاهر

اشراق الفجر يشهد على طرفي العليك ساهر

 

كاحل طرفك الناعس والجيد بي الأثيث غامر

مجدولات إيديك ، صدرك رجح طبّق الضامر

زيدني من تهيك .. طايع ليكا يا آمر

زهرة السامر ..

رفقاً بمجنونك يا ليلى بني عامر

 

في دولة صباك تايه يا اللي عشقي ماك فاكر

أصبح مسكنك قلبي الفي كل ثانية ليك ذاكر

لو رأيت محيك يا البي نظرتك ماكر

ليكا أكون شاكر

أم الأفق بيك تقنع  لا تولد شمس باكر

 

ننظر بانه تتمايل في ثياب لو قدم خاتر

وننظر كيف سدير يقلع تفاحو و ردف ناتر

بين ناعساتو يضوي الصارم الباتر

بي اللحاظ فاتر

لامعة سيوفو  تتبارق و من كسراتو يا ساتر

 

عاشق محيك الضاوي وعاشق حسنك النادر

تقبل لحظك يمرضني وانت على شفاي قادر

في هواك قابل تنفيذ أمرك الصادر

ليّا ليه غادر

حلمك جود واتعطف سارع بي لقاي بادر

 

و حياة طرفك الناعس و حياة حاجبك الداير

وحياة خدك المجلي و منظوم ثغرك الناير

بي لقاك تسمح لو كان في المنام زاير

فكري فيك حاير

كل ساعة جيش حبك يهجم في الصدر غاير

يوجد لها تسجيل بصوت أولاد الموردة و أولاد شمبات هنا

 

و أبدع في أدائها الفنان كمال ترباس...هنا

 

و قد جمعت بين التسجيلين مع نص الأغنية هنا

 

 

 

 

 

 

 

 

 

تم التعديل بواسطة werlid
اعادة تنسيق

شارك هذه المشاركة


الرابط الخاص بالمشاركة
مشاركة المحتوى على مواقع أخرى

أمير شعراء الحقيبة ... صالح عبد السيد أبو صلاح...

كتب عدة قصائد... في زوجته...زينب... و التي رمز لها بالرقم سبعة... و هو ترتيب حرف (ز)...حسب الأبجدية...

من هذه القصائد... قصيدة... سبعة ام لوناُ غامق الخدار...

سبعه أم لونا غامق الخضار


سبعه ام لونا غامق الخضار

فايقه السندس لمعه و نضار 

حسنك ندار

حاجبك زي قوس لسهامه دار 

عندي اختيار
جدول دمعي و سال بانحدار
وأصلو العاشق طالب الودار
بي  لماك أخضر من دون ابار
و ضميرك قيراط بالعبار


حسنك سحر
جسمي وطيفك زارني السحر
يورد دمعي المتل البحر
وليهو ضيافة النوم انتحر


اتجلي نار
قنديل وجهك يخفي الفنار
ليك نور ولي جوفي نار
وعينك تخجل غرر الكنار


نهاية القرار
صدرك يقلع و يرجع مرار
تسقي عشوقك كأس المزار
وللعاذل النار والشرار

و هي من قصائد الحقيبة التي لم أجد لها تسجيل صوتي للأسف...

هذه القصيدة جاراها الشاعر... علي المساح... بقصيدته... ظبي الخدر الماشاف غفار

ظبي الخدر الماشاف غفار

ظـبي الخـدر المـاشاف قفار منو العسجد عار الصفار

ظـبي الخـدر اين المـسار ناحل جسمي وزاد الحسار

جـيتك واقـع بـي انكـسار بُعدك عسري و قربك يسار

ظـبي الخـدر مـحـــياهو  دار حـسناً فـيه الماء و الخدار

مـن لحـظاتو سبب الودار ريقو خلاصة الفي خليتو دار

ظـبي الخـدر محياك قـمر مـيـَّـل فـرعك شال الثمر

طـايل ديـسك ينـضح خُـمَر مـن العـلقم هجرك امر

ظـبي الخدر في حشاي مقيم حزنك دمعي وحنان وغيم

لـمتين اسـمع من فاك نغيم طيب انفاسك يشفي السقيم

ظـبي الخـدر صـاد ما ودود جيدك دمية و ورد الخدود

جند انصارك منعو الحدود زور المضني و خلي الصدود

ظــبي الخدر طـرفك كحيل صدرك عالي و خصرك نحيل

من اردافك دايماً وحيل تحكي سحايب الضحي في الرحيل

ظـبي الخدر فـي إئتلاف عقلي غرامك لي جسمي لاف

نـومي وعـيني في اخـتلاف يسكر نغمك زي السلاف

ظـبي الخدر قـدرك وسـيم يا البي عفافك محجوب لثيم

مـني سلامك مامر نسيم يرضي لذاتي ويكوي الخصيم

قصيدة المساح لحنها و غناها كرومة... و يوجد بالمكتبة تسجيل بصوته هنا

 

يوجد لنفس الأغنية تسجيل بصوت ميرغني المأمون و أحمد حسن جمعة هنا

 

و إليك نص الأغنية...و تسجيلها بصوت كرومة هنا

 

 

شارك هذه المشاركة


الرابط الخاص بالمشاركة
مشاركة المحتوى على مواقع أخرى

تم النشر (تم تعديلها) · تقديم بلاغ

لأبي صلاح... قصيدة أخرى مجارية للقصيدتين أعلاه... وزناً شعرياً... و لحناً... و موضوعاً

فـرع البانة اليرنع يقـود

 

فـرع البانة اليرنع يقـود

نظـم افكـاري و لِـبسِـن عقود 

فــوقــك عــهـود

بـراءة و طـه و يـاسـين وهود 

لي شـلاّخك وقفن شهود

وأثـمر فـرعـك جوز النهود 


صـــيـدة الـخــدور

بخـلاف شـوفـتك أنا مابدور


فـاطرك رقّ و قلع الصدر

شـعـرك ظـلمة و وجهك بدر 


شـكــلـك لـطـيـف

جـدول دمـعي مـا بنـقـطِف 


جسمـك يلمع زي القطيف

أصبح لي النوم لو زارني طيف 


وســـطــك ضــمر

رشـرش عينيك لي اذاي أمر


مــن أشواقك هجرك أمر

يـخـجل محـيك نـور القمر 


صــيـــدة السَـروح

مـن بعـد المال تفـديك روح 

مـن نغماتك ريحان وروح

مـرهـم عرقك يبري الجروح 


عــقــلـي انـفـقـد

اشـواقي و للنوم عقد طـلـق

يرنع وسـطك للجوف وقد

فـوق لـي دروعك كتفك رقد 


طــيـبـــك عـبـق

سنـك بـراقـا يسـوي بـق 

تـرنـع تشبه مهر السبق

فـوق اردافـا كـتيـفا انطبق 


مـــنـــع الـوسـن

أفـرز رمـشك نشـابو سـن

كيف لا اخلف زملاي لسان

 و انـتي تفوقي الحور الحسان

يوجد لها تسجيل جميل بصوت أولاد الموردة... هنا

 

تم التعديل بواسطة werlid
تصحيح رابط

شارك هذه المشاركة


الرابط الخاص بالمشاركة
مشاركة المحتوى على مواقع أخرى

معذرة الرابط التاني أعلاه... نزلتو خطأ... و ما قدرت أزيلو.... لو زول من الادارة يزيلو أكون شاكر لهم

شارك هذه المشاركة


الرابط الخاص بالمشاركة
مشاركة المحتوى على مواقع أخرى

من الأشياء الطريفة جداً....و لها علاق بالقصائد السابقة...أن بعض فناني الحقيبة...قام بأخذ مقاطع متعددة من هذه القصائد...

و من قصيدتين أخريين... و صاغ من كل ذلك قصيدة ... عرفت باسم الليل الليل...هذا نصها

الليل الليل

طيبك عبق

سنك براقا يسوي بق
ترنع تشبه مهر السبق

فوق أردافا كتيفا انطبق

فوقك عهود

برا و طه و يس وهود
لي شلاخك وقفن شهود

أثمر فرعك جوز النهود

 

تتفدعي
و فوق لدروعك تتجدعي
بى جيوش شوقك لي تفزعي
وكل يوم ثوب صبري تمزعي

طرفك كحيل

وصدرك عالي وخصرك نحيل
ومن أردافك دائما وحيل

تحكي سحيب الضحى في  الرحيل


محياك قمر

ميل فرعك شال الثمر
طائل ديسك ينضح خمر

من العلقم هجرك أمر

 

يا نسيم الروض قابلا
بالتحية ان كان تقبلا
أوعى حاسب لا تقبلا
تبقى عاشق و الغي بلا

 

جدية الخدور

بخلاف شوفتك انا شن بدور
وسطك رق وقلع الصدر

شعرك ظلمة و محياك بدر

 

تتجلى نار
قنديل وجهك يخفي الفنار
ساكنة قليبي وما ليك جار
سكني روحي معاك بالإيجار

يا خفيف الروح يالرزان
فرعك المصقول خيرزان
بيك نشابه البان يبقى زان
انت كالميزان يا المزان

الأغنية يوجد لها تسجيل بصوت ميرغني المأمون و أحمد حسن جمعة هنا

 

و الفيديو التالي يوضح الشعراء الذين أخذ من شعرهم لتركيب الأغنية... و سأوضح ذلك بالتفصيل...

 

 

شارك هذه المشاركة


الرابط الخاص بالمشاركة
مشاركة المحتوى على مواقع أخرى

الليل الليل

طيبك عبق

سنك براقا يسوي بق
ترنع تشبه مهر السبق

فوق أردافا كتيفا انطبق

فوقك عهود

برا و طه و يس وهود
لي شلاخك وقفن شهود

أثمر فرعك جوز النهود

تتفدعي
و فوق لدروعك تتجدعي
بى جيوش شوقك لي تفزعي
وكل يوم ثوب صبري تمزعي

هذه المقاطع الثلاثة... في بداية الأغنية... للشاعر صالح عبد السيد أبو صلاح... لكنها من قصائد مختلفة له:

الأول و الثاني من قصيدته فرع البانة اليرنع يقود... الوارد ذكرها في هذه الصفحة...

أما المقطع الثالث...فهو من قصيدة أخرى له عنوانها سيبي قلبي مسجلة في المكتبة بصوت الفنان علي الشايقي...

طرفك كحيل

وصدرك عالي وخصرك نحيل
ومن أردافك دائما وحيل

تحكي سحيب الضحى في  الرحيل


محياك قمر

ميل فرعك شال الثمر
طائل ديسك ينضح خمر

من العلقم هجرك أمر

هذين المقطعين...من قصيدة ظبي الخدر الماشاف غفار...

للشاعر علي المساح...

موجودة في نفس هذه الصفحة

يا نسيم الروض قابلا
بالتحية ان كان تقبلا
أوعى حاسب لا تقبلا
تبقى عاشق و الغي بلا

جدية الخدور

بخلاف شوفتك انا شن بدور
وسطك رق وقلع الصدر

شعرك ظلمة و محياك بدر

تتجلى نار
قنديل وجهك يخفي الفنار
ساكنة قليبي وما ليك جار
سكني روحي معاك بالإيجار

ثلاثة مقاطع أخرى للشاعر أبو صلاح

الأول من قصيدته مالا سبعة ام صدراً علا

الثاني من قصيدته فرع البانة اليرنع يقود

و الثالث من قصيدته سبعة ام لوناً غامق الخدار...

 

يا خفيف الروح يالرزان
فرعك المصقول خيرزان
بيك نشابه البان يبقى زان
انت كالميزان يا المزان

هذا المقطع الأخير من الأغنية...

هو للشاعر محمد عبد الرحيم العمري...

من قصيدته يا شويدن روض الجنان...

موجودة ضمن صفحات هذا البوست...

شارك هذه المشاركة


الرابط الخاص بالمشاركة
مشاركة المحتوى على مواقع أخرى

أمير شعراء الحقيبة ... صالح عبد السيد أبو صلاح...

كتب عدة قصائد... في زوجته...زينب... و التي رمز لها بالرقم سبعة... و هو ترتيب حرف (ز)...حسب الأبجدية...

من هذه القصائد... سبعة زينة الدنيا و سعوده

سبعة زينة الدنيا

سبعة زينة الدنيا و سعودا

مني فارق يا ربي عودا

 

القماري الفي الجو صعودا

بالنشايد ربت لعودا

في الأراكة قياما و قعودا

وين سحائب صدحت رعودا

 

لعيوني الما بغر نجودا

و الدموع الغرقني جودا

بالشعور اتوفر وجودا

بي قليبي اطردن سجودا

 

الكتوف لي ردفك حسودا

برضو درعك يعلا و يسودا

يا الغزالة الجاها الأسودا

بالعيون المكحولة سودا

 

لما طرفك بالغيب ترودا

في فؤادي صدورا و ورودا

النسائم بالطيب برودا

من روائح تومتي الفروده

يلودا القلوب الماف شي

ليها طاعت من يوم ولودا

ان رحلت بعيد من بلودا

في قليبي تأكد خلودا

 

العوارض ما هويت صدودا

و الضفيرة الدرعين حدودا

البريق الفي العتمة دودا

نور سلاما و لمعة خدودا

 

يتني جيد الهضليم يقودا

في الملمة الرجج رقودا

و الثنايا اليجهر وقودا

در مخمس من در عقودا

 

في كنايا جدودا و رهودا

دفع مورد موية رهودا

شوف دموعي تكلل سهودا

قلبي يسجم في حب رهودا

يوجد لها تسجيل في المكتبة بصوت الفنان علي الشايقي هنا

 

 

 

 

شارك هذه المشاركة


الرابط الخاص بالمشاركة
مشاركة المحتوى على مواقع أخرى

قصيدة أبي صلاح السابقة...

جاراها شاعر أم درمان الكبير... عمر البنا... بقصيدته الشهيرة: امتى أرجع لامدر... وأعودا

امتي ارجع لامدر واعودا

امتي ارجع لامدر واعودا

واشوف نعيم دنيتي وسعودا

 

 

 

امتي تلمع بروق رعودا

حظوظي تنجز لي وعودا

روحي ضاعت في النار قعودا

لي هوِّن يا ربي عودة

 

 

أشوف حبيبتي وانظر خدودا

عساها ترحم تكون ودودة

مسامعي تسكر من ردودا

و تطفي ناري الفاتت حدودا

 

 

ياالمن فراقك ايامي سودا

خلاف وصالك دايماً كسودا

غير محاسنك مين يسودا

الملوك و يأسر لي الاسودا

 

 

أشواق كتيرة الدموع عهودة

و للمنام العيون سهودة

في الهجر روحي ضاع مجهودة

لم تزل حافظة لي عهودة

 

 

ما كانو يعرفو ناس بلودة

الغرام من قبال ولودة

من يوم وضوعا الفي الخير خلودا

فاتنة النفوس طايعة و جلودة

 

 

أبواب لقاها ام خدود موصودة

و نار العذاب في الفؤاد محصودة

هناي ومنية روحي ومقصودا

أشوف رشيم يضوي بين فصودا

  يوجد لها تسجيل في المكتبة بصوت كرومة هنا

 

و يوجد تسجيل آخر بصوت أولاد شمبات هنا

 

و يوجد كذلك تسجيل بصوت بادي محمد الطيب هنا

 

 

شارك هذه المشاركة


الرابط الخاص بالمشاركة
مشاركة المحتوى على مواقع أخرى

تم النشر (تم تعديلها) · تقديم بلاغ

للشاعر عمر البنا... قصيدة أخرى في حب أم درمان... و أهلها... و هي من أجمل ما كتبه

أمدر أماني و قبلة أماني


أمدر أمــاني و قبلة أماني

إنتِ جــــنة و داري الأمــــين


يا أماني و زهـــرة زمــــــاني

يا سعـــاد أنا حـــالف يمين
فيك ضماني و رَوعي و طَماني

فيك حياتي أما تعلمين


فيك بدراً فلق الدجــــنة

 أخفى نــــور الصبح المـــــبين
فيك زجلنا و كم فيك جــنة

و فـــــيك زلالاً للـــشاربين


إنت حـــرة و كم فيك درة

فيك كم مـــن عـــقـــد ثمين
إنت غــــرة و لي بلادنا صرة

فاق نســيمك للياسمين


فيك راحي بل فيك روحي

هاك مني الشــوق و الأنين
فيك سراحي بل فيك سروحي

و فيك جمالاً يسبي الجنين


فيك ظُبيَّاً ظاهـــر مبيَّنْ

روضو قلبك ما في العَسين
سوحو حياً كم ليهو حيَّن

روحي و ارواح البائيسين

 

عـد خراجك و عدد نتاجك

عد فوائدك لي كل حين
عـدَّ ما قد لــبِّستُ تاجك

عد فحـــولك و الصالحين


عد كمالِك و ربات جمالِك

عد كـــــلام المتكلمين
عد رمالك يا الليَّا مالِك

فيك ظُبيـَّاً داخل الكمين


من متيَّم في شندي قاطن

 السلام و الشوق و الحنين
و التمنِّي الما بيخفى فاطِن

زي تمنِّي الأب للبنين

 

مسجلة بصوت أولاد شمبات هنا

 

 

تم التعديل بواسطة werlid
تنسيق النص

شارك هذه المشاركة


الرابط الخاص بالمشاركة
مشاركة المحتوى على مواقع أخرى

تم النشر (تم تعديلها) · تقديم بلاغ

أغنية عمر البنا السابقة مجارية... لحناً...ووزناً شعرياً...و موضوعاً... لقصيدة الشاعر ابراهيم العبادي...

ليك سلامي يا امدرأمان...و تختلف عنها فقط في القافية...

ليك سلامي يا أمدر أمان

 

                                        ليك سلامي يا أمدر أمان

 أقبليهو و هاتي الضمان

 

إنتي دري وإنتي الجمان

 إنتي خوفي و فيك الأمان

فيك ريلاً هادي الطمان

 و كنوزاً تغني الزمان

 

يا نسيمي منك بريد

 تبقى ليهن مني البريد

عني قبل باهي الوريد

المتنى الفي امدر فريد

 

بعدو عرج حي الربوع

حي بيهن قمر السبوع

الفريع الرانع يموع

 حي و حيي اب حيلةً دموع

 

قولو ليهم طرفو انتقد

 جمرو غلب في الجوف وقد

هاج غرامو وصبر و انفقد

 داير يشوفكم و الحظ رقد

 

حن عقلو حين ليلو جن

 و الهموم حافاتنو جن

و الله يا نايرات الوجن

 صد دهري و قلب المجن

 

لاجة عيني وغارت الجروح

 هاهو حالي يغني الشروح

يا طبيبي أفضل تروح

خلقة ميت و ما فيا روح

 

راجي من رب العالمين

 ليها نرجع أنا و الأمين

في ربوعا نكون سالمين

 قولو آمين يا مسلمين

يوجد لها تسجيل بالمكتبة هنا

 

تم التعديل بواسطة werlid
تنسيق

شارك هذه المشاركة


الرابط الخاص بالمشاركة
مشاركة المحتوى على مواقع أخرى

الشاعر عبيد عبد الرحمن... له قصيدة مجارية... لقصيدة العبادي السابقة... وزناً شعرياً...و موضوعاً... و لحناً

و هي قصيدة... طال هجري يا امدرأمان

طال هجري يا ام درأمان

طال هجري يا ام درأمان

 بي بعادي حكم الزمان

انت أرضك من الجنان

 إنت زهرة و ناسك حنان

حار فراقك يرث الجنان

دا اليفاصل الحشا و الجَنان

يا حليل مخضوب البنان

 يا حليل نغماتو الحُنان

يا حليلنا و يا حليل زمان

 أم در أماني و كنا فــأمان

وجهو ظاهر كالبدر بان

 جيدو طائل و القامة بان

هجرو مابي و في جسمي بان

يا حبيب وين محبوبي بان 

يا حليل البان يا زميل

 يا حليل الغصن البميل

يا حليل محياهو الجميل

فكري طائش يا قلبي ميل

ليكِ حباً عم الفؤاد

 السلام يغشاك يا سعاد

لي وافر حظ السعاد

 روحي إن كان لي امدر تعاد

القصيدة غناها عدة فنانين... و يوجد لها تسجيل في المكتبة بصوت الطيب الصديق و محمد طه مع أولاد الموردة في الكورس

http://www.sudanesesongs.net/index.php?app=forums&module=forums&controller=topic&id=74335#comment-135238

استمع لها بصوتهم... و بصوت عبد الله البعيو هنا

 

 

شارك هذه المشاركة


الرابط الخاص بالمشاركة
مشاركة المحتوى على مواقع أخرى

و في هوى أمدرمان أيضاً... كتب خليل فرح قصيدة... اذكر بقعة ام درمان

اذكر بقعة امدرمان

اذكر بقعة امدرمان

وانشر في ربوعا أمان

ذكر يا شبابنا زمان

 

دارنا و دار أبونا زمان

فيها رفات جدودنا كمان

ما بننساكِ خِلقة ضمان

جنة و حور حِماكِ أمان

 

بطرا الاسسوكِ زمان

كانوا نحاف جسوم ما سمان

كانوا يحلحلوا الغرمان

يساهروا اتفقدوا الصرمان

 

في السودان فِتيح معروف

ولسه ابعنجة خور مسروف

ودنوباوي زول معروف

باقي وديك مشارع ابروف

 

كانوا جبال تقال ومُـكان

نزلوا اتربعوا الاركان

خلوا البقعة كل مكان

آهلة و رازّة بالسكان

 

ليه يا كعبة العربان

غضبك فينا و عرسك بان

قبال نسأل الركبان

حِـبـِّـك من حسودك بان

غناها الفنان عبيد الطيب...

 

 

شارك هذه المشاركة


الرابط الخاص بالمشاركة
مشاركة المحتوى على مواقع أخرى

لشاعر الحقيبة الكبير... محمد علي عبد الله الأمي...

قصيدة مجارية وزناً و لحناً و موضوعاً... لقصيدة الخليل أعلاه... و لا تقل عنها روعة

اذكر بقعة الآمال

 

  اذكر بقعة الآمال

جنة شعبنا اجمال

أم العلما و العمال

***

  صفي النية في الأعمال

جاهد و اترك الاهمال

أهدي الروح و اهدي المال

و اكسي الدنيا نور و جمال

***

خالف كل حال بطال

و اصدق لا تكن ماطال

يا سوداني شرحك طال

أبواتك أسود أبطال

***

فكر في الحياة و اختال

لا يهمك زئير و قتال

اهزم حطم المحتال

عزمك مافي ليهو مثال

***

قل للامو و العذال

ثابت عهدنا لازال

نحن الما بيريعنا نزال

نحن الطامة و الزلزال

حي يا قوم كفانا دلال

نحن شعارنا عز و جلال

المر في بلادنا زلال

و الموت في عروضنا حلال

***

هاكم يا أحبة مقال

رغم الخائن الندال

نحن بلادنا يا عقال

لابسة العفة تاج و عقال

يوجد لها تسجيل في المكتبة بصوت أولاد شمبات هنا

 

و يوجد تسجيل ثان بصوت أولاد الموردة هنا

 

و قد جمعتهما هنا

 

 

شارك هذه المشاركة


الرابط الخاص بالمشاركة
مشاركة المحتوى على مواقع أخرى

للشاعر عمر البنا...قصيدة أخرى في ذكر أمدرمان هي يا حليل أمدرمان

يا حليل أمدرمان

يا حليل أمدرمان يا حليل ظباها

في جنح الليل فاح طيب شذاها

عيني فاضت و النوم أباها

 

مر يا نسيم بجنان رباها

و ترقب محبوبتي و زور في خباها

في حالة غفلة قبل انتباها

وصل سلامي و جيب لي نباها

 

روق يا نسيم حين تدخل ضراها

أوع من الخطر حين ما تراها

حواجبا قوس ديمة موتراها

سهاما تصيب يمنى و شمال و أمامها و وراها

 

قال لي النسيم خليها ماها

ملتفتة نحوك و بعيد سماها

قاسية و نفورة و محروس حماها

البدر أقرب ليك من لماها

 

قت ليهو صبراً عل و عساها

ترحم تراعي و يهون قساها

و تعافي روحي و يضيع أساها

و أمتع نظري في خدودا و ناعساها

 

ما السلسبيل و الدر و الغيم لي فاها

و ايه بدر التمام لي نورها و صفاها

دي محاسن غريبة الغفرا مؤيداها

على الكواكب و الحور ديمة مسيداها

يوجد لها تسجيلان بالمكتبة.... أحدهما بصوت أولاد شمبات هنا

 

و الثاني بصوت صديق الكحلاوي هنا

 

شارك هذه المشاركة


الرابط الخاص بالمشاركة
مشاركة المحتوى على مواقع أخرى

ما زلنا في الحديث عن المجاريات في أغنيات حقيبة الفن....

أنقل الحديث لنوع متفرد من المجاريات.... أقصد الذي يجاري فيه الشاعر... نفسه..!

من ذلك.... ما فعله الشاعر الكبير أبو صلاح...

فقد كتب قصيدته المشهورة خلي العيش حرام... و لحنها و غناها كرومة....... ثم جاراها بقصيدة أخرى...!

خلي العيش حرام

خلي العيش حرام مادام اري الموت يحل ** ما بين الرميش فوق الطريف الكحيل

 

هزاز صدرو ميل فدع الخصر النحيل ** بالرجاج يقلع شبه المهر الوحيل

النوم مني فر و قلبي ناوي الرحيل ** من غير المنام طيف الخيال مستحيل

 

والاني اشتياق و قلبي اصبح وجل ** واتمنت محاسنك روحي جيل بعد جيل

والاكي الجمال يرفع لقدرك يجل ** واتمنى الهلال ينصاغ لي قديمك حجل

 

بنخوض الرماح لو كان تزيد او تقل ** و نهاب من ضمير الأهيف المنفقل

بنقابل المدافع بالثبات و العقل ** و نخاف سيف عيونو اللمعو يبرق صقيل

 

يا المنك معار تكحيل شويدن الخميل ** علمتي الغصون مع النسيم كيف تميل

مختارك يحاكي الشولة دمعو الهميل ** والتختارو لي لا شك جميل يا جميل

اشتهرت القصيدة... بصوت الثنائي ميرغني المأمون و أحمد حسن جمعة...التسجيل في المكتبة هنا

 

شارك هذه المشاركة


الرابط الخاص بالمشاركة
مشاركة المحتوى على مواقع أخرى

جارى الشاعر أبو صلاح قصيدته السابقة بقصيدة أخرى لا تقل عنها جمالاً هي أضيع في هواك

أضيع في هواك


أضيع فى هواك يا مهفهف حرام

و ما ذنبى عندك خلاف الغرام

 

حبيب قلبى زاد الفؤاد اضطرام

يسيل دمعى لي ذكركم احترام

خلاف قربكم خلي ما لي مرام

و قرب المحب من شؤون الكرام

 

جميل يصطبيك حبو لي جروحي سام

يبق نور عقيد فاطرو في الابتسام

مسلح عيون لحظو لي روحي سام

و سيف العيون أمضى من الحسام

 

هجم شوقى فاض صدري فى دموعي عام

و رؤية خديدك ألذ النعم

لبعدك أضيع يا مدلل نعم

و ليلة لقاك خير من ألف عام

 

عن اسمك لسان العذول فى بكم

محكم جمالك دقيق الحكم

و كم أبدي ليك شكوى يا خلي كم

و انتا خصيمي وانتا الحكم

 

رقيق خصرو سادل عليه الغمام

يجاذبو النسيم فى المرور كالزمام

يميل بالشمال و الجنوب و الامام

يكاد ان يرك فوقَ غصنو الحمام

 

بي نورك شهير في الخلوق زي علم

تقيد من شعاعك كواكب الظلام
محال اصتنط لي عذولك كلام

أضيع في هواك يا بديع والسلام

يوجد لها تسجيل في المكتبة بصوت أولاد الموردة هنا

 

و هنا الأغنية بصوتهما مع النص

 

شارك هذه المشاركة


الرابط الخاص بالمشاركة
مشاركة المحتوى على مواقع أخرى

في نفس الاطار... قصدي مجاراة الشاعر لنفسه....

كتب الشاعر عمر البنا أغنية يا عيني وين تلقي المنام.... و هي من أجمل قصائده....

ثم جاراها بقصيدة... طال وجدي بيك.... التي لا تقل عنها روعة

يا عيني وين تلقي المنام

ياعيني وين تلقي المنام أحبابك جفوني 

 

 يامن جــــــــــــفوني

 هلا كفــاكم جـــور

أنا عقلي راح

 دمع الفراق لازال أتلف جفوني

 

صدوا  و نفوني

 لا  أدري ليه  مأسور

زادوا  الجراح

خلوا  السهاد و الشوق أتلفوني

 

مــتى يـسعـفـوني

 لـو بالـنظر مـسـرور

ألـقى الـنصاح

 ما ضرهم لو كـان شـرفوني

 

مـتى يـنـقـذونـي

 مـن الظـلام لـلـنـور

قرب الصباح

 في الجوف جيوش أشواقهم غزوني

 

هم يعرفوني

 أنا بين زفير و حرور

أنا قلبي طاح

زادو العلي أضعاف ما لفوني

 

يـالـيـل طـرونـي؟

 قــال ليا ما  مـذكـور

جرى دمعي ساح

وا حسرتي الأهوال أعتروني

 

كـيـف أسـلى نـوني

و أسـلى العــيون الحـور

ذات الصفاح

فيهن شفايا و طبي و جنوني

الأغنية يوجد لها تسجيل في المكتبة بصوت الأمين برهان هنا

 

و غناها فنانون كثار... منهم عبد العزيز محمد داؤود... و الذي تفرد بغناء بيت الشعر الملون بالأحمر في النص أعلاه...فهو غير موجود في تسجيل الأمين برهان....

و إليكم الأغنية مع النص... بصوت الأمين برهان و عبد الله البعيو

 

 

شارك هذه المشاركة


الرابط الخاص بالمشاركة
مشاركة المحتوى على مواقع أخرى

تم النشر (تم تعديلها) · تقديم بلاغ

استعرض الشاعر الكبير عمر البنا.... تمكنه الشعري... في القصيدة السابقة....في تحفة شعرية...

أولى ما يلفت سمعك هو هذه القوافي الكثيرة.... في البيت الواحد...

لاحظ معي... القوافي الأولى في كل بيت(سأورد كل قافية مع الجملة التي وردت بها لنتأمل روعة العبارات):

يا من جفوني...صدوا و نفوني....متى يسعفوني...متى ينقذوني...هم يعرفوني...يا ليل طروني؟...كيف أسلى نوني...

تتبعها قافية ثانية تتكرر في كل بيت أيضا:

هلا كفاكم جور...لا أدري ليه مأسور...لو بالنظر مسرور...من الظلام للنور...

أنا بين زفير و حرور...قال ليا ما مذكور... و اسلى العيون الحور...

و قافية تالتة:

أنا عقلي راح...زادوا الجراح...ألقى النصاح...قرب الصباح....أنا قلبي طاح...جرى دمعي ساح...ذات الصفاح

ثم يختمها الشاعر بقافية البيت الرائعة.

تم التعديل بواسطة werlid
تصحيح خطأ املائي

شارك هذه المشاركة


الرابط الخاص بالمشاركة
مشاركة المحتوى على مواقع أخرى

أكبر دليل على روعة قصيدة الشاعر عمر البنا... السابقة هو مجاراته لها... بقصيدة أخرى على نفس الوزن الشعري...و في ذات المعاني...مع اختلاف في القوافي فقط....و هي قصيدته... طال وجدي بيك

طال وجدي بيك

طال وجدي بيك

 و بحق نبيك

عيريني نظرة

لا تحرميني

 

لمتين تريني

تلك الخدود

يا الفي ضراك

جلَّ البراك

للحسن زهرة

في العالمينِ

 

لا تتركيني

أنا في الوجود

بائس كفاك

يا نون جفاك

أورثني حسرة

متى تدركيني

 

لو تعلميني

خلاً ودود

مأسور هواك

ما لي سواك

مثقال ذرة

لا تألميني

 

شوقي و حنيني

فات الحدود

حالي الغباك

حال الأباك

أنفاسي زفرة

زايد أنيني

 

لا تهجريني

خلي الصدود

بي حق زهاك

و بحق بهاك

يا حبيبة مرة

وجهك أريني

 

سهرانة عيني

أبت الهجود

يا نون بلاك

أولى الهلاك

سيبيها نفرة

يا حبيبة بيني

اعتمدت على تسجيل عصفور السودان في ترتيب الأبيات... التسجيل هنا

 

كما يوجد تسجيل بصوت ميرغني المأمون و أحمد حسن جمعة هنا

 

و قد جمعت بينهما في هذا الفيديو

 

 

شارك هذه المشاركة


الرابط الخاص بالمشاركة
مشاركة المحتوى على مواقع أخرى

أبدع الشاعر البنا... في القصيدة الثانية...كما أبدع في الأولى...

و أبدع كل من غناهما....بدون شك

شارك هذه المشاركة


الرابط الخاص بالمشاركة
مشاركة المحتوى على مواقع أخرى

أتمنى يكون عام 2019

عاماً لكل خير و كل جديد  

دمتم

قديم جديد.mp3

شارك هذه المشاركة


الرابط الخاص بالمشاركة
مشاركة المحتوى على مواقع أخرى

تم النشر (تم تعديلها) · تقديم بلاغ

أول أغنية غناها الفنان محمد أحمد سرور.... معلناً بها نهاية غناء الطنابرة.... و مدشناً بها بداية غناء الحقيبة....هي أغنية

ببكي و بنوح و بصيح.... كتبها له الشاعر ابراهيم العبادي.... مجارياً بها أغنية أبو صلاح وسطاً ضمر يتهادى... و هي من غناء ما قبل الحقيبة

ببكى وبنوح وبصیح
 

ببكي و بنوح و بصیّح للشـوفـتـن بتـریّح
فرع النقا الممیّح مـنو المـسـك بفیّح
وكتین صباحو یبیّح بلـبل قلوبـنا یصـیّح


یا جـنـة الطبیعة ایـاك زھـرة ربـیعا
صحت شراھا و بیعا عـینیك حروب ربیعة


ختمو البروق و رعودو تـغـرید بلابل عودو
نظروا الخلق لي عودو جافى المنام مـا بعودو


متنوعات ازھارا في خدودا تجري انھارا
لیلا الطلع في نھارا ضـلل فـؤادي و ھرا


في روحتي و باكرتي دایـماً مـقدم كـرتي
مابتسھي عن ذاكرتي یـا اللي صفاي عكرتي

 

الجیدو طال واتنى ودر جـماعـة متـلنا
التوب شبك في التنة یانـاس انحـنا كتـلنا


لابسة الحشم أزمّة و مـالكا المـلایین ذمة
الحاشا ما بتتذما ضـیع اخـوك بالذمة

 

بطرى الليالي ديكا الكانت في ناديكا

يضرب سرور مزيكا يا الأمين الله يجازيكا

 

أغنية وسطاً ضمر.... بصوت بشير الرباطابي موجودة في المكتبة هنا

 

أما أغنية العبادي فهاهي مع نبذة عن بدايات الفنان سرور....

ذكرى سرور.mp3

تم التعديل بواسطة werlid
تصحيح خطأ املائي

شارك هذه المشاركة


الرابط الخاص بالمشاركة
مشاركة المحتوى على مواقع أخرى

أول قصيدة يؤلفها الشاعر الكبير أبو صلاح.... معلناً بها انضمامه لمجموعة شعراء الحقيبة التي كان زعيمها ابراهيم العبادي، هي قصيدة له مطلعها:

ليلة القدر نصحبا

ألف أهلاً و مرحبا

أبو صلاح قبلها كان يكتب شعر الدوبيت ، و قصيدته هذه لم أعثر على نصها كاملاً للأسف...

 و هي مجارية في الوزن لقصيدة ابراهيم العبادي:

نظرة يا ظبية السلام

نظرة يا ظبية السلام
تبقى من هجركم سلام

 

الغرام عامل احتلال

و الهجر هذا مش حلال

رشفة من نيلك الزلال

فليعش حاجبك الهلال

 

الغرام عجلو ذو خوار

ضلل أفكارنا يا نوار

نرجو بي حرمة الجوار

نبقى لي معصمك سوار

 

العيون نومهن رحل

و الجسيم أضحى في محل

و انتي في أقرب المحل

حظي سواك زي زحل

 

الوضيب للوريد يقود

و الحزوز ظاهرة فيها قود

الضمير بهدل العقود

و النهود فتنة يا حقود


دمتِ في روضة الزهور
تجري فى خدودك النهور
تبقي زي سالف الدهور
خالية من ربقة المهور


الأدب انتي يا العفاف

نظرتك عندي زي زفاف

لو أجد حولك التفاف

أرضى من عيشي بالكفاف

الأغنية لها تسجيل بصوت الفنان عوض الكريم عبد الله

 

و قد حاولت أن أكملها نصاً و صوتاً من تسجيل آخر.... في الفيديو التالي

 

 

شارك هذه المشاركة


الرابط الخاص بالمشاركة
مشاركة المحتوى على مواقع أخرى

قصيدة ألم البعاد.....من أوائل أغاني الحقيبة التي كتبها الشاعر ابراهيم العبادي....مجارياً بها قصيدة ... آمنة

آمنة... كتبها شاعر غير مشهور في الحقيبة.... هو الشاعر المهندس... عبد الرحمن شوقي.... و لد و توفى في أم درمان عام 1960

غناها و سجلها بصوته فنان الحقيبة... التوم عبد الجليل... شقيق عصفور السودان... ابراهيم عبد الجليل...و يكبره سناً

آمنة

الشاعر عبد الرحمن شوقي

 

آخ أنا في عذابك و إنتي لاهية و آمنة

تلعبي بي القلوب مستأمنة و مطامنة

وقت روحنا أسرتيها و ملكت زمامنا

خافي من حساب رب العباد يا آمنة

 

وقت الليل برد فاح لي نسيماً زاكي

و أشبه لي بي رؤياك و طيب ريَّـاكِ

حدثني الحديث الكان رواه لفاكِ

و يا ما أحلى الحديث القالوا لي مضناكِ

 

وقت ليلي انقسم و اظلم عليّا و جنا

سمعت الباب نتر  فاحت روايح الجنة

قلبي الكان قبيل ثابت تحول و جنّا

ما طقنا السلام يا آمنة و اتلجنّا

 

لاح لي من تحت ثوب الحرير المحيَا

و قبلي فيهو عاشقاً  كم أمات و أحيا

الشاف الجسيم اللي فؤاد كيف احيا

حيالي أنا لو يموت من بعدها أو  يحيا

 

ملت عيني عجب عليتا شفت بنانا

محننة زيو قط ما حننت حنانة

رمتني أنا من دواعج لحظها و اسنانا

يا ساتر علي من نبلها الوسنانة

 

روحي تعلقت في الخد تحت لي زماما

و ما بين الشلوخ و اللحظ زانتا شامة

تسقيها الدموع أنهر غمامة غمامة

و نفسي تحوم تحلق فوقها كني حمامة

 

ليه يا غافلة بي نار البعاد  تكويني

تخليني في صد من  قبل تكويني

دلالك و انت عارفة و هجرك الكاويني

عليك ست الضريح يا آمنة لا تكاويني

 

أعينيني على شجوٍ على تبريحي

قلبي فيكِ بات اليوم غير صحيحِ

كأني طيرة طايرة و في مهب الريحِ

فسيح الأرض في عينيها غير فسيحِ

تسجيل الأغنية بصوت التوم عبد الجليل موجود في المكتبة هنا

 

و الأغنية نصاً و صوتاً موثقة هنا

 

شارك هذه المشاركة


الرابط الخاص بالمشاركة
مشاركة المحتوى على مواقع أخرى

 ألم البعاد
 

حي ألم البعاد حشش كلايا و أجرى

دمعي أنا شوقي طايل لي ظبيات واجرة
..
ياحليل الغصون المايسات في القلعه
زي الريل حدايب و كالبدور في الطلعه
مع فرط الجمال زايدات حداقة و شلعه 
يات من كان تجيك تقدح تزيدك ولعه 
..
بذكر جلستن يوم جمعة بعد النافله
ربات العفاف الطبقتن الما سافله
دارسات كل فن إلا الأمور الآفله 
و العجب الخلق شبه الأرايل الجافله
..
يات من كان تصادفك حافلة أو غير حافله
تتناول فؤادك و تمشي منك غافله
تنظر قامة ممشوقة و مضمرة كافله
نغماتاً تنسيك الفروض و النافله 
..
إقتبس البدر من آمنة نورو و دارتو
الخز و الدهب عار من جسيما نضارتو
الدر حين وهب لي فاها شوفو قدارتو
أضحى على الرؤوس يُحمل و نافذه إدارتو 
..
فرع الياسمين من النسيم يتنى
سالكه مضمره و التنه فوق التنه
عبى نهودو كالتنة و جا يكتلنا 
فزنابا الشهاده منو اللقاها متلنا 
..
إن جاتك تقود في عوما زي الوزة
و اللفتات غزالاً بي نتايل فزة
وكتين تدي جوز عينيها كسرة و غزة
زي الفارس الكتل حسامو وهزة

يوجد لها تسجيل في المكتبة بصوت ميرغني المأمون و أحمد حسن جمعة في الرابط التالي

 

نفس التسجيل مع إضافة النص في الفيديو التالي

 

 

شارك هذه المشاركة


الرابط الخاص بالمشاركة
مشاركة المحتوى على مواقع أخرى

تم النشر (تم تعديلها) · تقديم بلاغ

أعود مرة أخرى لمجاراة الشاعر لنفسه.... التي أوردت منها....

مجاراة أبي صلاح لنفسه.... في قصيدتيه: أضيع في هواك ..... و خلي العيش حرام

ثم عمر البنا في طال وجدي بيك.....و يا عيني وين تلقي المنام

أضيف الآن خليل فرح..... 

فقد كتب قصيدته.... ميل و أعرض..... ثم جاراها.... لم خيل الضل على الأريل

ميـل و أعــرِض


ميل و أعرض كتـر أمراضي

 بى هـواكم والهـوان راضـي


جُنّ ليلي و هاجت أعـراضي

 سَحَّ دمعي و طـاشت أغـراضي

هذا بعض البي عدا أمراضي

و انت داري و غاضي ماك راضي


لسّه تـايه فى الدلال ماضي

 هل تنـاسيت عهدنـا المـاضي

فى صحيفة قلبي كم ماضي

 ماضـي خـاتم لحظـك الماضي


جسمي بالي  و من زمان قاضي

 ها هـو حبـك بين أنقـاضي

هدى روعك أوعَ لا تقاضي

 ما بشـارعك ما بكـوس قـاضي


المضلل رشدي يـا هـادي

 و المكتـِّر فى الغضـا سهـادي

الجبين الفي الظلام هـادي

 والقـوام السيـدو  متهـادي

 

يا حبيبـي فيـم تهديـدك

 طول عذابي و هجـري ما بفيدك
روحي ضـاعت فى ايدك وحاة ريدك

 كيف ضاعت يا سـلامة أيـدك

يوجد لها تسجيل في المكتبة بصوت عبد العزيز العميري في الرابط التالي

 

أضفت للتسجيل أعلاه نص الأغنية في الفيديو التالي

 

تم التعديل بواسطة werlid
خطأ املائي

شارك هذه المشاركة


الرابط الخاص بالمشاركة
مشاركة المحتوى على مواقع أخرى

و انظر الآن لمجاراة خليل فرح لقصيدته السابقة بهذه الدرة التالية....

لمّ خيل الضل على الأريل

 

لمَّ خيل الضل على الاريلْ

 في مشارعو الصيد ورد قيَّلْ

 

القنيص حين شافِنْ اتخيَّلْ

 جرى دمعو  و دمُّو  ساحْ سيَّلْ

انتفض قلبو  و خفقْ ميَّلْ

 فوق جروح الليل بَرَقْ و شيَّلْ

 

طلعن كالانجم الزهر

و أقبلن كالموج في النهر

في ثياب العفة والطهر

و جمال الماء و الزهر

 

الجمال اتجلى في شفوفو

 كلو  شايل الحِنَّة في كفوفو

جلَسَنْ و البُهرة في صفوفو

 كالحرير و الوانو  في رفوفو

 

حلل الافراح بدت تبهر

كدا و انوار الخدود تبهر

البساط الاحمدي الازهر

كلو در متخفي او جوهر

 

حفلَنْ قلنا السما اتجلى

 و النَجِم بتضارى في الحِلّة

كالجناين تلقى كل حُلّة

 فيها وردة و نرجسة و  فُلّة

 

فيهِنْ السَلسَالْ شِفا الغُلّة

 فيهن العِلّة و دوا العِلّة

كلهِنْ مُتبلِّماتْ إلاّ

من لِحاظِنْ أرحم الجُلّة

 

الكنار صاح و الغصون مالتْ

 و الرياح صنَّتْ، عُقُبْ شالتْ

العُقود فوق الصدور جالتْ

 و العيون زي السيوف صالتْ

 

الرأيتو شفى القلب طيّب

 و السمعتو و فاتني فاح طيِّب

زيدني خليت قلبي نا عطيِّب

و الله طيِّب قلنا يا الطيب

يوجد لها تسجيل في المكتبة بصوت الفنان سيف الجامعة

 

و قد دمجت الصوت مع النص في الفيديو التالي

 

شارك هذه المشاركة


الرابط الخاص بالمشاركة
مشاركة المحتوى على مواقع أخرى

الشاعر عبيد عبد الرحمن ... جارى قصيدة خليل فرح ميل و أعرض بقصيدته....

ضاع صبري.... و التي كان يغنيها الفنان أحمد الطيب...

ضاع صبري

كلمات : عبيد عبد الرحمن

 

ضاع صبري أين يا وصـلي.. 
قلبــي بي نار الغرام مصـلي 


يا عـقود آمالي اتصــــــلي.. 
مابفيق من النـويح أصلي 
عقلي يوت كل ساعة ينقصلي.. 
فيك ضاع ياطـيبة الأصلِ


ايه ده؟ ليل و البدر واضـح لي..!
أم ده ديسـك محيو فاضــح لي 
يا العيون عاد روّقـي و اح لي.. 
كُفّى رمشك ده المجـرح لي

 

زادَ من نار الصدود وجلي.. 
يا معاني الشـعر و الزجــــــــلِ
باهي جيدك و الخــديد مجلي.. 
ترى ده الهـلاك في الأعين النجـلِ

 

ليك نسايم الشوق دوام رسلي.. 
في هواك كم كم ضايعاً مَســلي 
ما سليتك وأنتِ كيــف تسلي.. 
أنا صرت ميت و الدموع غسلي

 

مالي يا ليل همّي تجمع لي .. 
و ديمـه يا نيراني تشــتعـلي 
يا بدر بالله أســطع لي.. 
وياسـهيل أرجـوك اشفع لي

 

ترمي هامتك في الكـــفل تعلي.. 
تتني قامتك و للصـدير تعـلي 
ياحمام بالله أسـجع لي.. 
مالو ضـــايع في الخيال فعلي

موجود تسجيلها في المكتبة بصوت الفنان أحمد الطيب....و قد أرفقته مع النص أعلاه في الفيديو التالي

https://www.youtube.com/watch?v=WTnIsZyviY0&feature=youtu.be

 

 

شارك هذه المشاركة


الرابط الخاص بالمشاركة
مشاركة المحتوى على مواقع أخرى

أعود بالحديث مرة أخرى.... لذكر القصائد التي جارى بها بعض الشعراء أنفسهم.... لأتوقف هذه المرة مع عتيق

الشاعر محمد بشير عتيق... أمير المجددين في شعر الحقيبة.... تميز في مجارياته....

فهو عندما يجاري قصيدة....تكون تلك المجاراة مختلفة في الوزن الشعري و في القافية....و لكنها تلتزم الموضوع و المعاني

للنظر إلى قصيدته.... ما بنسى ليلة كنا تايهين في سمر....

و التي تجاريها في الموضوع قصيدته الأخرى.... ليلة و يا لها من ليلة....

ما بنسى ليلة كنا تايهين في سمر

ما بنسى ليلة كنا تايهين في سمر
بين الزهور أنا وأنت والنيل والقمر

وين يا جميل يوم كنا تايهين في سمر
من انسنا اتمتعنا بي جني الثمر

كم قلبي بالأنفاس لأنفاسك غمر
الجو سكر من ريك اتعطر خمر

ما بنسى ليلة كنا في شاطىء النهر
نتعاطى خمر الحب بكاسات الزهر

البدر مزق ظلمتو و سفر ازدهر
في النيل سطع بي نورو  اتقطع بهر

الليل هدأ و الجو صفا و غاب الأتر
النسيم يجيب من توتي أصوات المتر

انا يا جميل بي صوت ضميري المستتر
من شعري كم اسمعتك ألحان في وتر

شفت النجوم تنظرنا بي نظرة شذر
لما القمر في افقو بغيابو اعتذر

صافين عفاف يا حبيبي خالين من قذر
في هوانا لا عاذل و لا مراقب حذر

أنا بي غرامك يا حبيب دمعي انفجر
و أنا من غناك ايقظت سكان الشجر

قبال اراك انا كنت في حيرة و ضجر
و اليوم حظيت بلقاكا يا ظبي الحجر

موجودة في المكتبة بصوت فنانين كثر....

لكني اخترت لكم سماعها بصوت الفنانين أحمد الطيب و صديق الكحلاوي مع مرافقة نص الأغنية في الفيديو التالي

 

 

شارك هذه المشاركة


الرابط الخاص بالمشاركة
مشاركة المحتوى على مواقع أخرى

انشئ حساب جديد او قم بتسجيل دخولك لتتمكن من اضافه تعليق جديد

يجب ان تكون عضوا لدينا لتتمكن من التعليق

انشئ حساب جديد

سجل حسابك الجديد لدينا في الموقع بمنتهي السهوله .


سجل حساب جديد

تسجيل دخول

هل تمتلك حساب بالفعل ؟ سجل دخولك من هنا.


سجل دخولك الان