• إعلانات المنتدى

    • Gamiela

      ضيوفنا الكرام   21 يون, 2017

      اعلان هام - فتح جميع منتديات المكتبة للزوار دون الحاجة للعضوية http://www.sudanesesongs.net/ قمنا اليوم بفتح المكتبة لجميع الزوار لتنزيل جميع الأغاني التي جمعتها المكتبة عبر السنين ...
      كان الحلم ان يأتي هذا اليوم في حياة الصديق الراحل المقيم عادل خليفة ...
      خطفه منا القدر ... و لكنا الان نوفي بالوعد ...
      الان و دون الحاجة للتسجيل او العضوية ...
      يمكن لجميع الزوار الاستمتاع بمواد المكتبة الغنائية و التي تصل في حجمها الى اكثر من 500 جيجا بايت
      فقط اضغط على الرابط للوصول للمكتبة ...
      ثم ابحث عن جيل فنانك المفضل و تابع الحرف الابجدي ... بعدها ستصل الى جميع المواد متاحة دون الحاجة للاشتراك ... للتنبيه ... فقط أعضاء المكتبة الذين يمكنهم ( رفع ) المواد للمكتبة و مازال باب العضوية متاح لكل من يريد رفد المكتبة بمواد جديدة .. و كل عام و جميع اهل السودان بخير و عافية   عن إدارة و مشرفي و أعضاء مكتبة الأغنية السودانية يحيى قباني المشرف العام http://www.sudanesesongs.net/
عبد المنعم عثمان خليفة

د. عزالدين هلالي وقصيدة يا الودَّعت الدنيـــــا عوافي

عدد ردود الموضوع : 1

يا الودَّعت الدنيـــــا عوافي


(محمد عبد المجيد سعيد ، سوداني شهم ، عاش مع الفشل الكلوي في الإمارات ما يقارب ربع القرن دون كلل أو ملل ، وكان منزلهم واحة لمعظم السودانيين في ابو ظبي ، فإلى روح محمد عبد المجيد وزوجته وبناته وأمه ونور الدين وأهله وأصحابه وأحبابه ونادية وقرشي).

د. عز الدين هلالي


خمسة وعشرين سنة في السكَّة

في مشوار بخلص في جكَّة

من باب بيتكم لـى( بني ياس) *

شوف يامحمد دنيا الناس

دنيا كريهة تفيهة ولكَّة

ما بتعادل أصغر فكَّة

وعاملين ليها سلام القايد

قومة وقعدة وسوق وقصايد

خمسة وعشرين سنة في السكَّة

بالإيمان والتَّقوى ملفَّح

هاشي وباشي وبسمك زايد

من ما كنتو في شارع زايد

لحدَّ وصلتو أقاصي مصفَّح

قلَّب شوفهـا براك واتصفَّح .

شوف السكَّة الإنت مشيتها .

شوف الرَّحلة الإنت بديتها

من في المركزي قبل سنين

وانت هناك بالرُّوب الأخضـر .

يوم جبروك وسكنت العنبر

كنت حزين

وكأنَّك حاسس

أنو الرحلة دي آخرها شين

بس دي الدنيا

وكلّو مسطّر

خمسة وعشرين سنة في السكّة

في مشوار مرسوم ومشبّر

شوف كم خطوة الإنت خطيتها

شوف كم حجرة

و شوف كم عنبر

شوف كم حقنة وشوف كم إبرة

شوف كم مشرط وشوف كم صفرة

وكم زقزاق

خمسة وعشرين سنة في السكّة

ماشي تتبِّن في الأرزاق

خمسة وعشرين سنة في السكّة

ماشي على العاطي الرّزّاق

وما بتستفسر كم الباقي

عارف الدنيا كسور وبواقي

ورامي على الهادي الخلَّاق

حتى في ألمك هادي وراقي

ما شافوك ميئوس ومكسَّر

خمسة وعشرين سنة في السكَّة

صابر وبتعاني ومتماسك

خمسة وعشرين سنة في السكَّة

في حقّ الله ودينك ماسك

مستمسك بي روح القدرة

وماشي تتبِّن في الأرزاق

يوم زوَّجت البنت الأولى

فرحت وعظَّمت الخلَّاق

وماشي تتبَّن في الأرزاق

يوم زوَّجت البنت التانية

فرحت وعظَّمت الخلَّاق

وماشي تتبَّن في الأرزاق

يوم زوَّجت البنت التالتة

فرحت وعظَّمت الخلَّاق

وماشي تتبَّن في الأرزاق

يوم زوَّجت البنت الرابعة

فرحت وعظَّمت الخلَّاق

وماشي تتبَّن في الأرزاق

وما بتستفسر كم الباقي

وبينك وبين الميس ما باقي

وماشي تتبَّن في الأرزاق

حتى في ألمك هادي وراقي

ومستمسك بي روح القدرة

ولامَّي عليك الدمعة الحرَّى

وما بننساها البنت البَّرة

دية هنادي الصالحة البَّرة

جادت ليك بى كل مسرَّة

وأمها بنت الناس الحرَّة

وناسك وأهلك وكل أصحابك

وناس العنبر وكل أحبابك

وأمّك ونوري ونادية وقرشي

وكلّ بناتك ناس السّترة

ياخي الدنيا بدونك ولاشي

خمسة وعشرين سنة في السكّة

قاصد الميس متوكِّل وتمشي

وتاري الميس حاري ورجَّاي

خمسة وعشرين سنة في السكَّة

وتاري الميس بى جنبك جاي

بينك وبينو مسافة شاي

بس بتعدِّي كباري مصفِّح

بالإيمان والتَّقوى ملفَّح

وتدخل بين السَّيف والخضرة

تلقى الأمَّة هناك منتظرة

الفاتوك والجايين بكرة

وتلقى الميس الفيهو السُّترة

طوبة وموية ورملة وحفرة

ويعني خلاص

إنتهت الجولة

خمسة وعشرين سنة في السكَّة

وبس بنقول:

" إنّا " و " لاحول ..."

وراجين المولى العطَّاي

خمسة وعشرين سنة في السكّة

والموضوع بى جنبك جاي

بينك وبينو مسافة شاي

بينك وبينو قوانين دولة

بينك وبينو كريم عطَّاي

خالق ورازق وأجلو موافي

ويلا ودعتك عند المولى

يا الودَّعت الدنيا عوافي

وقمت بدورك كامل ووافي

يلا ودعتك عند المولى

سيد الروح الكافي الشافي

سيد الكون والناس والقدرة

وشوف الحكمة

دي أول مرة

وإنت الرُّوحك وجنَّك تقرأ

تهوى الكلمة

وتقرأ قصايدنا وتهواها

وتفرز توبها

شوف الحكمة

وشوف فحواهـا

دي أولَّ مرَّة


إنّو نصوغ

ولأول مرة

كلمة مشوبة

وفيك مشبوبة

وما تقراها.


عز الدين هلالي

الخرطوم – بحري

5/7/2014




حيث مقابر ابو ظبي


شارك هذه المشاركة


الرابط الخاص بالمشاركة
مشاركة المحتوى على مواقع أخرى

انشئ حساب جديد او قم بتسجيل دخولك لتتمكن من اضافه تعليق جديد

يجب ان تكون عضوا لدينا لتتمكن من التعليق

انشئ حساب جديد

سجل حسابك الجديد لدينا في الموقع بمنتهي السهوله .


سجل حساب جديد

تسجيل دخول

هل تمتلك حساب بالفعل ؟ سجل دخولك من هنا.


سجل دخولك الان