• إعلانات المنتدى

    • Gamiela

      ضيوفنا الكرام   21 يون, 2017

      اعلان هام - فتح جميع منتديات المكتبة للزوار دون الحاجة للعضوية http://www.sudanesesongs.net/ قمنا اليوم بفتح المكتبة لجميع الزوار لتنزيل جميع الأغاني التي جمعتها المكتبة عبر السنين ...
      كان الحلم ان يأتي هذا اليوم في حياة الصديق الراحل المقيم عادل خليفة ...
      خطفه منا القدر ... و لكنا الان نوفي بالوعد ...
      الان و دون الحاجة للتسجيل او العضوية ...
      يمكن لجميع الزوار الاستمتاع بمواد المكتبة الغنائية و التي تصل في حجمها الى اكثر من 500 جيجا بايت
      فقط اضغط على الرابط للوصول للمكتبة ...
      ثم ابحث عن جيل فنانك المفضل و تابع الحرف الابجدي ... بعدها ستصل الى جميع المواد متاحة دون الحاجة للاشتراك ... للتنبيه ... فقط أعضاء المكتبة الذين يمكنهم ( رفع ) المواد للمكتبة و مازال باب العضوية متاح لكل من يريد رفد المكتبة بمواد جديدة .. و كل عام و جميع اهل السودان بخير و عافية   عن إدارة و مشرفي و أعضاء مكتبة الأغنية السودانية يحيى قباني المشرف العام http://www.sudanesesongs.net/
عادل خليفة السبلوقة

قدر الله ام " صدفة "

عدد ردود الموضوع : 6

محمد وردي 18-2-2012

 

اسماعيل حسن 18-2-1982

 

 

 

كتب الدكتور محمد بادي في اسماعيل حسن هذه الرائعة.

 

ثلاثون عاما مضت علي رحيل اسماعيل ..

 

وهي تصور حالنا في فقد وردي

 

 

ارمي الدمعة فوق الدمعتين ياعين

بعد الليلة حابسها الدموع لي مين

نزيف الدنيا من حد البلد غربي

ونزيف الدنيا لاحد البلد شرقي

وجوم عامة الليالي العامره

كل الدنيا خاتة الخمسة فوق اتنين

رحيلك وجعة يا سماعين

رحيلك نجعة من دار الفرح والزين

رحيلك طعنة في لهات الحبى دريفين

رحيلك وقفة فوق درب العليك باكين

فيها نهاية المشوار وحد الفرحة والامال

وحد الفال وحد الزين

ارمي الدمعة فوق الدمعتين ياعين

ويعد الليلة حابسها الدموع لمين

بعد نزلت سكاكين القدر

مسنونة ديل فوق ديل

وشربت من بكرينا المعتق

حالتو ياالداسنو من السيل

وياالمحزون وحرابنا متكلات قدامو

فوق مشنكسات الخيل

وياالداخرنو من زمن الحساب

شفعنا رابطين الحجر بالتيل

وفجاءة يجينا من طرف السماء مريسيل

ينعب فوق كلنكاكول غراب هابيل

ويبقي رحيل

رحيل كل الغيوم الهامعة متواسرات

رحيل كل الشهور العامرة بالخيرات

رحيل الطينة من طرف الجزر يومات

رحيل الخضرة قدام منجل الهدام جفاف وممات

رحيل البادية فوق برقا وراء نجيمات

رحيلك مو رحيل أفراد

رحيل اجيال

رحيل بلدا تمام وكمال

يا العرشت فوق نخل السواقي الشال

واتمددت فوق النيل من الشلال وللشلال

وياالهاجرت فوق ريش الرهو رحال

تظل مرسوم علي باب الليالي سؤال

بعد عشعشت في خاطر الغبش موال

واتبللت من الموية بين السعفة والبلال

بعد عرقك برق في ترابنا حد ما شال

واتمددت غادي وجاي يمين وشمال

بعد الحال

منو البقدر يجيب غربال يغربل روحك المدسوسة في الاجيال

وفي نفس الدغش مبثوثة في الشتلة ونداها السال

بعد الحال

منو البقدر يطاول حرفك المعقود

علي برقا حرير وهلال

مسطر فوق رقاب البرد

فوق الصخرة والتمثال

بعد الحال

رحيلك ياالمشرشر في مداخل الدنيا كالاوصال

رحيلك هزه في العقدة

ومجامع الروح كما الزلزال

ارمي الدمعة فوق الدمعتين ياعين

بعد اليلة حابساها الدموع لمين

كتير من شاف ديارو العامرة

هاجت فوق درب وداي

كتير من عدا فوق درباً

بلا يوادع بلا يناشد كبار القوم وياخد راي

كتير ياعين

كتير الغابوا ماحضروا

وكتير الراحوا ما عادوا

وكتير البمشوا منو جاي

الا الناعي

عمرو الناعي ما طاف البلاد من جم

وتبكي طويرة الاحزان سنين وسنين

مصيرة تساسق المسكينة بين الباسا والباساي

ترفرف من سخاي لسخاي

وتسال عن صدور مغسولة بالدوباي

و تنزل فوق حلقات مجالس الشاي

تقول الشيخ وفي الشاشاي

تبل الريق من الدمع البيوشل من ارامل الحي

وتشرق بالرحيح في الردحه و الووب احي

وتمرق من محاري الناس تولول فيها جرس الصي

وتصرخ فايقة ياجلابة اقيفوا لي

وتسعل ضايقة ما شفتوه زولا لي

تضيع فرخاتا في المجهول

ويرحل من دريبا الضي

آه آه ياطويرة الاحزان

آه لو كان تعرفي البي

جرحك انتي صاب الريش

وجرحا لي مسافر في النسيج الحي

دريبي بعيد وحزني فريد

ومما رحل البلبل الغريد

بسرح في عيون الناس

بسـأل ولوسؤالي يفيد

كيف الدنيا تصبح دنيا

والصيد يبقي ياهوالصيد؟

مين يقدر ينضم عقود منقوشة

ترقد في حزوز الجيد

ومين يضفر كلام الريد

كلو جميل مصيرو يجي ومصيرو يفوت بلاتخليد

كتاب الكون يظل مقفول

بلا خاتمة بلا تمهيد

وحتي النيل مصيرو يكون مجرد موية شاقة البيد

منو البيقدر يجيب ليكم خباراتو

رقصة موجو في الشاطئ

رواويسو , حكاياتو

رقاد القمرة جنب النجمة فوق رملا مراياتو

ولما تغيب ينوم النيل موشح بعباياتو

وزي ما النيل يضيع في الدلتا يتلاشي ويموت مشلول

انحنا كمان تفيض امالنا

تضيع تنشره في ساحل المجهول

وا اسفاي

وا اســــــــــفاي

وا اسفاي علي حرفاً شمخ في الطول

وكيف الليلة في بطن التراب مسبول

حرام تبلينا يا ايام

حرام تملينا شوق وهيام

اتارينا بنشيل من حرفك الجواني يا سماعين

ونقعد في حواشي الحضرة وانت تكب علينا غمام

وماعارفين حروفك نازفة من شريان

من دم القليب الاصلو مابريان

لما شربنا لما طربنا واتلفتنا ما لقيناك يا انسان

وشفنا روحيتك الشفافة ركبت هودج الاحزان

محمل فوق جناج ملكين

ودربو علي مشارف الواحد الديان

قوايمو شقايق النخل الوقع حزنان

مضفور بي سعف يابس

مفرش بي كباد اماتنا والحبان

مزمل بي حبال صبرا فقدناهو زمان

مضلل بالدموع شرقان ........

عجيب ياهودج الاحزان

مواسم الهجرة ما حانت ولا زمن الرحيل قد حان

نسافر ليك وزادنا الشربه من بحر الحزن والاهه والحرمان

وداك اليوم كان وداع الهودج المتهادي

كان جامع رجلات الحضر والريف

طيور السافل المحزونة جات بي ليله

تاركةجناها للريج والمطر والزيف

وروح ترهاقه والعباسي وروح أبواتنا

وريحة الماضي كلها جات

ملوك شايق .. وقف شاويش

منكس بي حرابو واقف بي قفاهو تابعو شايل سيف

وبعد الليلة كل بنية تلبس فوق صديره اكليل

يكون مزروع فيهو قلب الشهيد

وانت شهيدنا يا سماعين

يا الله .. يا الله .. يا الله

بعد ما شلت اسماعين

وفات

معاهو باقي كلام وباقي حنين

يالله بعد الفجعة نظل شاكرين

نظل واقفين علي بابك معاي طلبين

يكون عبود مع ود توم كذا شاهدين

قدام قبر الولي سماعين

نظل واقفين

يوم الليلة والباكر

الي ماشئت يالله

الي يوم الفصل والدين

وداك اليوم يكون يومنا

ونقالد شيخنا سماعين

 

 

شارك هذه المشاركة


الرابط الخاص بالمشاركة
مشاركة المحتوى على مواقع أخرى

مصادفة غريبة ان الثنائي الجميل تاريخ وفاتهم الاتنين نفس اليوم والشهر .. ومرثية د.محمد بادي في اسماعيل حسن .. كانها ترثي وردي .

شارك هذه المشاركة


الرابط الخاص بالمشاركة
مشاركة المحتوى على مواقع أخرى

محمد وردي 18-2-2012

 

اسماعيل حسن 18-2-1982

 

سبحان الله

شارك هذه المشاركة


الرابط الخاص بالمشاركة
مشاركة المحتوى على مواقع أخرى

وأي صدفة يا خي الشالتك مننا يا عادل؟

 

ياخي حرام عليك ... والله غلبنا وما عارفين نمشي وين ...

 

تصدق أني بصحي ايام و بقول أكيد كابوس و حيمشي و انت بعد شوية بتضرب

 

وتقول لي " كيف الحال ياخي "

 

وبعدين معاك ...؟

شارك هذه المشاركة


الرابط الخاص بالمشاركة
مشاركة المحتوى على مواقع أخرى

وأي صدفة يا خي الشالتك مننا يا عادل؟

 

ياخي حرام عليك ... والله غلبنا وما عارفين نمشي وين ...

 

تصدق أني بصحي ايام و بقول أكيد كابوس و حيمشي و انت بعد شوية بتضرب

 

وتقول لي " كيف الحال ياخي "

 

وبعدين معاك ...؟

 

 

صابنا الذهول ذى التكنو قبل ده مافارقنا زول قبل الرسول

وللا التقول اول قلوب فى الدنيا يغشاها القدر

كل الفريق شوقر وراك ياجرحنا الما بندمل

وين ماشى يانبض الحريق سايب المشاعر ريق دقيق!!

سلام عليك في علاك يا عادل

و

لك الرحمة والمغفرة

اما الصبر

فهو بيد عزيز مقتدر .. يمن به علينا حين يشاء

والحمد لله

شارك هذه المشاركة


الرابط الخاص بالمشاركة
مشاركة المحتوى على مواقع أخرى

قبل شهر من وفاته

نقل لنا المرحوم عادل قصيدة محمد بادي في رثاء وردي واسماعيل
حسن قدر الله أم صدفة ونقول اللهم لانسألك رد القضاء بل اللطف فينا
رحم الله الأخ عادل خليفة وصالح دعواتكم

.Adil.png

شارك هذه المشاركة


الرابط الخاص بالمشاركة
مشاركة المحتوى على مواقع أخرى

انشئ حساب جديد او قم بتسجيل دخولك لتتمكن من اضافه تعليق جديد

يجب ان تكون عضوا لدينا لتتمكن من التعليق

انشئ حساب جديد

سجل حسابك الجديد لدينا في الموقع بمنتهي السهوله .


سجل حساب جديد

تسجيل دخول

هل تمتلك حساب بالفعل ؟ سجل دخولك من هنا.


سجل دخولك الان