• Announcements

    • Gamiela

      ضيوفنا الكرام   06/21/2017

      اعلان هام - فتح جميع منتديات المكتبة للزوار دون الحاجة للعضوية http://www.sudanesesongs.net/ قمنا اليوم بفتح المكتبة لجميع الزوار لتنزيل جميع الأغاني التي جمعتها المكتبة عبر السنين ...
      كان الحلم ان يأتي هذا اليوم في حياة الصديق الراحل المقيم عادل خليفة ...
      خطفه منا القدر ... و لكنا الان نوفي بالوعد ...
      الان و دون الحاجة للتسجيل او العضوية ...
      يمكن لجميع الزوار الاستمتاع بمواد المكتبة الغنائية و التي تصل في حجمها الى اكثر من 500 جيجا بايت
      فقط اضغط على الرابط للوصول للمكتبة ...
      ثم ابحث عن جيل فنانك المفضل و تابع الحرف الابجدي ... بعدها ستصل الى جميع المواد متاحة دون الحاجة للاشتراك ... للتنبيه ... فقط أعضاء المكتبة الذين يمكنهم ( رفع ) المواد للمكتبة و مازال باب العضوية متاح لكل من يريد رفد المكتبة بمواد جديدة .. و كل عام و جميع اهل السودان بخير و عافية   عن إدارة و مشرفي و أعضاء مكتبة الأغنية السودانية يحيى قباني المشرف العام http://www.sudanesesongs.net/
Sign in to follow this  
Followers 0
يحي قباني

أتراح ... أفراح - بقلم هاشم صديق

2 posts in this topic

أتراح ... أفراح

 

( رجل وزوجته يجلسان علي مقعدين أمام جهاز التلفزيون ... الزوجة تتابع بتركيز برنامجاً عن الانتخابات علي شاشة التلفاز ... والزوج يطالع في صحيفة باستغراب شديد وأمامه علي منضدة صحف أخري )

( الزوجة وهي تلاحظ أحد المرشحين لرئاسة الجمهورية في التلفزيون وهو يخطب أمام جمهور غفير بحماس شديد )

 

الزوجة : تفتكر الحيفوز منو يا سامي ؟

الزوج : ( سارحاً وهو يطالع الصحيفة ) المريخ

الزوجة : ( تنفجر ضاحكة ) مريخ شنو يا سامي .. بقصد ليك في

الانتخابات

الزوج : ( متضايقاً ) كلهم بهاجمو في بعض .. واحد فيهم ما اتكلم عن

مشاكلنا وقال بحلها

الزوجة : في واحد منهم ... من ناس مرشحين المعارضة .. قال لو

انتخبتوني الكهرباء ما بتقطع تاني .. بوفر ليكم الكهرباء ثمانية

وأربعين ساعة في اليوم

الزوج : أها .. عرفنا ديك زادو الزمن ساعة .. ده عايز يضرب اليوم

في اتنين

الزوجة: ( مواصلة ) وقال الموية ما حتقطع تاني .. ما .. ما.. شنو يا

ربي ؟.. آآي ... ما ظل يجري ماء النيل

الزوج : والجاري ده نهر المسيسيبي ولا دجلة ... مش المويه بتقطع

برضو ؟

الزوجة : ( وكأنها تذكرت شيئاً فجأة ) ءانت يا سامي ناس ياسر عرمان

جابوهم لابسين كمامات في قناة الجزيرة ... خايفين من

انفلونزا الخنازير ؟!

الزوج : لا... قالو مافي حرية تعبير ... يعني الأفواه مكممة

الزوجة: عليك الرسول ؟! ( تضحك ) وأنا قايلة ظهرت انفلونزا

الخنازير ... ولا الحمير

الزوج : ( وهو يعود لمطالعة الصحيفة ) الحمير بقوا يضبحوها ..

ويوزعو لحمها

الزوجة : ( تصرخ ) سجمي يا سامي ... عليك الله ؟

الزوج : ءانتي ما سمعتي ولا شنو ... ؟! .. ما قريتي جرايد امبارح

الزوجة : ما قريتها ... ووب علي ووب علي ... ما تقول لي انحنا

بنأكل في لحم الحمير وقايلنو عجالي ؟

الزوج : ( منفعلاً ) وأنا أقول يا سوسن .. انحنا الكاتل حيلنا واحد

وعشرين سنه مما جو الناس ديل .. شنو .. لا قدرنا نمرق

انتفاضه واحده محمية ..لا انتفاضة سلمية... لا قومنا التونسية ...لا

ءاعتصمنا في ميدان المولد ... يا هو أكل لحم الحمير

الزوجة : ( تقف فزعة فجأة ) سامي

الزوج : شنو؟

الزوجة : ( مرعوبة ) اللحمة الجبتها الليلة دي .. ودخلتها التلاجة ...

دي لحمة شنو ؟!

الزوج : لا ... دي لحمة عجالي

الزوجة : عرفتها كيف ؟!

الزوج : الجزار قدامي .. قطع لي من ورك العجالي المعلق في

الجزارة

الزوجة : وعرفتو كيف ده ورك عجالي ؟

الزوج : ما ... ما ظاهر .. ورك ... ورك عجالي

الزوجة : ( متوترة ) عرفتو كيف ؟! ... بتعرف كيف الفرق بين ورك

العجل ... من ورك الحمار

الزوج : ( متلجلجاً ) .. ما ورك الحمار .. أصلو .. يعني .. ما .. ما

طبعاً بكون ... ( يصرخ بعد أن أعياه الشرح ) .. ما عارف

... أنا يا سوسن متخصص صيدلة .. ولا ورك حمير وبقر ..

( ينفعل أكثر ) هو أنا عارف الفرق بين المرشحين .. لما أفرز

ليك الفرق بين ورك وورك ؟

الزوجة : خلاص ... خلاص أهدأ .. ما تزعل روحك ( تجلس )

الزوج : ( يعود لمطالعة الصحف ... ثم وكأنه يحدث نفسه ) وعاين ده

كمان ... قبضوهو بوزع في الكلاب

الزوجة : في الديمقراطية ... كانوا بوزعو اللبن

الزوج : والمنشورات

الزوجة : وأمبارح ... قريت في جريدة كمان .. عريس باقي لي عرسو

تلاته يوم ... اغتصب ليهو طفل

الزوج : ( شارد الزهن ) يكون ده خم الرماد

الزوجة : قلت شنو

الزوج : ( منتبهاً ) .. لا ... ما ... ما قلت حاجة

( يتصاعد ضجيج وغناء من جهاز التلفزيون )

الزوجة : ( تتمعن في شاشة التلفزيون ) عليك الله ... شوفو الناس ديل

بعرضو وبنقزو كيف ... عشرين سنه يطيرو ويقعوا

الزوج : ( ضائقاً ) عليك الله يا سوسن ... غيري الفضائية السودانية دي

بتبوظ أعصابي .. لما أشوفها نفسي بتكتم زي التقول عندي

أزمة ( الزوجة تمسك بالريموت وتقوم بتغيير المحطة )

الزوجة : ( تهلل فرحة ) يا سلااام ... أفراح أفراح في النيل الأزرق

... عاين يا سامي .. عاين ... المذيع داير يسأل العريس

والعروس .. الا .. الا العروس مالها زي المتخلفة كده ؟!

( يظهر المذيع علي الشاشة وهو يتوجه بالمايكرفون نحو

العريس)

المذيع : مرحب بيك يا عريسنا ... ءانت طبعاً الليلة فارس الحوبة

.. الفارس الفرحان .. و .. و طاير .. الحقيقة داير أسألك

.. وانت داخل حسه علي الحفلة ... كنت بتفكر في شنو ؟!

العريس : ( متوتراً وشارد الذهن ) في الانتخابات

المذيع : ( منفعلاً ) يا سلااام ... انت عريس .. و.. فارس وطني

غيور

( ثم مندمجاً أكثر ) ويا ريت تحدثنا عن قضية دارفور .. و..

العريس : ( مندهشاً ) دارفور ؟!

المذيع : ( مستدركاً ) لا .. معليـ .. معليش .. أنا الحقيقة ءاجابتك

بس خلتني .. خلتني أنفعل ... نسأل ... نسأل العروس

( يتوجه بالمايكرفون نحو العروس )

المذيع : ءانتي يا عروسة .. طبعاً دي ليلة العمر .. في ليلة زي دي

.. دايرة تقولي للعريس شنو ؟

العروس : ( بعبط وهي تمط الكلمات ) داايره اقووول ليهو .. أغلبك

بالمااال ... وتغلبني بالعيااال

المذيع : ( يضحك في توتر ) تقصدي .. تقصدي يغلبك بالمال ...

وتغلبيهو بالعيال

العروس : لأ ... أنا أغلبو بالمااال .. وهو يغلبني بالعيااال .. عشااان

حسه في ... في تحول ديمقراااطي .

Share this post


Link to post
Share on other sites

العروس : ( بعبط وهي تمط الكلمات ) داايره اقووول ليهو .. أغلبك

بالمااال ... وتغلبني بالعيااال

المذيع : ( يضحك في توتر ) تقصدي .. تقصدي يغلبك بالمال ...

وتغلبيهو بالعيال

العروس : لأ ... أنا أغلبو بالمااال .. وهو يغلبني بالعيااال .. عشااان

حسه في ... في تحول ديمقراااطي .

عزيزي يحي قيل ان الكاتب نبض الامه , وكلام العروس {الساسه

السودانين} او من يتحدثون بلغه الطير في الباقير هذه الايام دون تحديد

رؤيه او تصور لما ال اليه حال بلدنا المنكوب السودان, جعلني اتمني

لو كان استاذنا هاشم يكتب عن شعب الواق واق وليس الشعب السوداني صانع اكتوبر وابريل..............

Share this post


Link to post
Share on other sites

Create an account or sign in to comment

You need to be a member in order to leave a comment

Create an account

Sign up for a new account in our community. It's easy!


Register a new account

Sign in

Already have an account? Sign in here.


Sign In Now
Sign in to follow this  
Followers 0