• Announcements

    • Gamiela

      ضيوفنا الكرام   06/21/2017

      اعلان هام - فتح جميع منتديات المكتبة للزوار دون الحاجة للعضوية http://www.sudanesesongs.net/ قمنا اليوم بفتح المكتبة لجميع الزوار لتنزيل جميع الأغاني التي جمعتها المكتبة عبر السنين ...
      كان الحلم ان يأتي هذا اليوم في حياة الصديق الراحل المقيم عادل خليفة ...
      خطفه منا القدر ... و لكنا الان نوفي بالوعد ...
      الان و دون الحاجة للتسجيل او العضوية ...
      يمكن لجميع الزوار الاستمتاع بمواد المكتبة الغنائية و التي تصل في حجمها الى اكثر من 500 جيجا بايت
      فقط اضغط على الرابط للوصول للمكتبة ...
      ثم ابحث عن جيل فنانك المفضل و تابع الحرف الابجدي ... بعدها ستصل الى جميع المواد متاحة دون الحاجة للاشتراك ... للتنبيه ... فقط أعضاء المكتبة الذين يمكنهم ( رفع ) المواد للمكتبة و مازال باب العضوية متاح لكل من يريد رفد المكتبة بمواد جديدة .. و كل عام و جميع اهل السودان بخير و عافية   عن إدارة و مشرفي و أعضاء مكتبة الأغنية السودانية يحيى قباني المشرف العام http://www.sudanesesongs.net/
Sign in to follow this  
Followers 0
يحي قباني

مشهـــد درامـــي - بقلم هاشم صديق

1 post in this topic

* شخص يحمل تلفون ( موبايل ) بالقرب من عربة لاندكروزر حديثة.. الرجل والعربة على مرمي حجر من موقف مواصلات رئيسى مزدحم .. اصحاب مهن هامشية حول المكان .. شحاذون ... وحركة كثيفة للمارة .

 

الرجل : ( وهو يتحدث في الموبايل ) ايوه يا سامي بتكلم معاك بخصوص المشروع أنا

دلوكت في الموقع ... (يضحك ) ايوه موقع ممتاز .. التخطيط انو يكون برج من

عشرين طابق .. ويكون فيهو اسواق وسينما وقاعات محاضرات ومؤتمـــرات . ( تقترب منه طفلة في ملابس بالية ومتسخة وهي تسير حافية )

 

الطفلة : ( في صوت يستجدي ) كرامة لله

الرجل : ( لايهتم بالطفلة ويستمر في الحديث في الموبايل ) دراسة الجدوي ممتازة يا سامي

.. العائد سنوياً ما اقل من مليارين ...

الطفلة : كرامة لله .. كرامة لله ... اديني حق الفطور ( تحاول لفت انتباهه بان تجذبه من

جلبابه )

الطفلة : اديني حق الفطور .. كرامة لله ( الرجل يتحول عنها في حركة نافرة .. ويستمر في

المحادثة التلفونية )

الرجل : قلت شنو يا سامي ؟!... موقف المواصلات طبعاً حيتشال من هنا .. والجماعة

البيبيعو في اXXX والشحادين... كلهم حيمشوا من هنا.

الطفلة : ( تجذبه من جلبابه مرة أخري ) أديني حق الفطور.

الرجل : ( يضيق ) أمشي ... الله يدينا ويديك

الطفلة : الله يديك عربية تانية .. أديني حق الفطور

الرجل : ( ضائقاً ) امشي يا بت ..

الطفلة : الله يديك تلفون تاني ..

الرجل : قلت ليك أمشي ( يواصل الحديث في التلفون ) ايوه يا سامي ... المبني عشرين

طابق .. حكاية خمستاشر صرفنا النظر عنها .

الطفلة : ( تجذبه من يده التي تحمل الموبايل ) اديني طابق لله .

الرجل : ( يصرخ في وجهها ) يا بت قلت ليك امشي ..

الطفلة : ( باصرار) أديني حق الفطور وطابق عليك الله

الرجل : يا بت انتي شحادة ولا مجنونة .. طابق شنو البدوك ليه ؟

الطفلة : واحد بس .. مش انت عندك كتار ؟

الرجل : قلت ليك امشي ( يعود للمحادثة ) ايوه يا سامي ياخي مكان الموقع مزعج .. دي

شحادة بلها بتشحد طابق ( يضحك ) ايوه الشحادين كتار ... ولكن ما تخاف الوزير

قال الموقف ده حيترحل بره البلد في الخلا .. خليهم يشحدوا هناك .

الطفلة : ( تمسك بجلبابه بقوة ) الماشي الخلا منو ؟ ادينا كرامة لله .. حق الفطور وطابق ..

الرجل : ( يقفز فزعاً وهو يصرخ ) يا بت وسختي الجلابية

الطفلة : ( تغافله وتخطف الموبايل من يده وتركض حول العربة وهي تضحك )

الرجل : ( يصرخ ) يا بت الكلب ..

الطفلة : ( تتحدث في الموبايل بطريقة مضحكة ) ادونا كرامة لله وطابق... دايرين تودوا

موقف المواصلات الخلا .. نشحد منو في الخلا يا وزير ... دايرنا نشحد وين ...

الو .. ادونا ادونا حق الفطور ... كرامة لله

الرجل : ( بأنفاس لاهثة ) يا بت جيبي الموبايل ( الطفلة تضحك وهي تراوغه ).

الرجل : جيبي الموبايل... انعل ابوك .. والله الوزير ما حيخلي شحاد .. ولا حافلة .. ولا

بياع هنا

الطفلة : ( لازالت تجري حول العربة وهي تتحدث في الموبايل بطريقة مضحكة ) الو ..

الوزير ادينا حق الفطور .. كرامة لله .. ( المارة يتجمعون وهم يضحكون )

الرجل : ( يصرخ منفعلاً ) جيبي الموبايل يا بت ( يخرج شاب انيق من وسط المارة ..

يخاطب الطفلة وهو يضحك )

الشاب : خلاص يا عزيزة اديهو الموبايل ( الطفلة تعطي الموبايل للرجل وهي تضحك ..

والرجل مندهش )

الشاب : ( يضحك وهو يشير بيده واصابعه الي اتجاه الشارع ) ... معاك الكاميرا الخفية .

الرجل : ( ثائراً وهو يمسك بخناق الشاب ) كاميرا خفية لمنو ؟ .. لينا نحنا ؟ .. عشان

تعرفونا بنعمل في شنو ؟ ... علي الطلاق اكلم الوزير يمسح الشريط ويرفدك ...

... و... ويقفل الفضائية...فضائية حقتنا ... كمان تفضحناااا ؟!!

Share this post


Link to post
Share on other sites

Create an account or sign in to comment

You need to be a member in order to leave a comment

Create an account

Sign up for a new account in our community. It's easy!


Register a new account

Sign in

Already have an account? Sign in here.


Sign In Now
Sign in to follow this  
Followers 0